مهترلام (پژواک،۲۰ غويی ۱۴۰۰): د لغمان ولايت چارواکي وايي، دولت شاه ولسوالۍ کې په څلورو هوايي بريدونو کې ۴۸ وسله وال وژل شوي او ۱۸ نور ټپيان شوي دي.
د لغمان والي رحمت الله يارمل د غويي په ۲۰مه رسنيو ته وويل، چې نن تر غرمې وړاندې افغان هوايي ځواکونو د دولت شاه ولسوالۍ مربوطاتو کې د وسله والو طالبانو پر پټنځايونو، د راټولېدو ځايونو او کمينونو څلور هوايي بريدونه کړي دي.
دی وايي، په دغو بريدونو کې ۴۸ طالبان وژل شوي او ۱۸ نور یي سخت ټپیان دي.
د لغمان والي زياته کړه چې دغه راز په دغو بريدونو کې د وسله والو یو شمېر وسلې هم له منځه وړل شوې دي.
د يارمل په وينا، په دولت شاه ولسوالۍ کې د ملي اردو په مشرۍ د وسله والو طالبانو د ځپلو او د شته ګواښونو د ختمېدو لپاره د ګډو ځواکونو ځمکني او هوایي عملیات په بریالیتوب سره روان دي.
بلخوا په ختيځ کې د سيلاب قول اردو د وياند مرستيال سيد مقصود صاحبزاده پژواک اژانس ته وويل چې د دولت شاه ولسوالۍ ترڅنګ اليشنګ او الينګار ولسوالیو کې هم د وسله والو د ځپلو په موخه د ګډو افغان ځواکونو عمليات روان دي.
هغه زياته کړه، دغه عمليات پر يو شمېر سيمو د وسله والو تر بريدونو او امنيتي ګواښونو وروسته پيل شوي چې لا هم په درېيو برخو کې دوام لري.
طالبانو د خپلو وسله والو د تازه مرګ ژوبلې په تړاو څه نه دي ويلي، خو په تېر کې يې په لغمان کې د خپلو وسله والو د وژل کېدو راپورونه رد کړي دي.
Visits: 93
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن