کابل (پژواک، ٢٠ غويى ١٤٠٠) : د سعودي عربستان د حج او عمرې وزارت د کرونا په سختو احتياطي تدابيرو کې سږ کال د حج فريضې مراسمو ترسره کولو اعلان کړى دى.
دا په داسې حال کې ده چې تېر کال د حج مراسم په ډېر محدود ډول ترسره شول چې يواځې په کې سعودي مېشتو شاوخوا زرو کسانو برخه اخيستې وه.
په عادي حالاتو کې له ټولې نړۍ څخه شاوخوا دوه نيم ميليونه کسانو هر کال د حج په مراسمو کې برخه اخيسته.
د سعودي عربستان د حج وزارت وياند تېره شپه د وزارت ټويټرپاڼه کې په يوه لنډه خبرپاڼه کې ويلي چې سږ کال به د حج مراسم د کرونا په سختو احتياطي تدابيرو کې ترسره شي.
هغه زياته کړې چې د حج د نورو عملياتي کارونو په اړه به ډېر ژر بشپړ معلومات خپاره کړي.
سرچينې ويلي چې دوى د حاجيانو د خوندي مراسمو لپاره بشپړ اقدامات کوي، څو هغوى په بشپړه روغتيايي فضا کې خپل مراسم ترسره کړي.
د افغانستان د حج او اوقافو وزارت د نشراتو رييس فضل محمد حسیني پژواک اژانس ته وويل چې دوى هم د سعودي عربستان له اعلان څخه خبر شوي، خو تر اوسه ورته د سعودي حکومت رسمي خبر نه دى ورکړى.
هغه زياته کړه، کله چې سعودي د حج د مراسمو بشپړ عملياتي پروګرام اعلان کړي، بيا د افغانستان حکومت هم چمتوالی پیلوي.
