کابل ( پژواک، ۲۲ غویی ۱۴۰۰) : افغانستان پر فلسطیني مسلمانانو د اسراییلو بریدونه غندلي، بلخوا په دې بریدونو کې د وژل شویو فلسطینانو شمیره له ۵۰ تنو اوښتې او سلګونه ټپیان شوي دي.
د بهرنیو چارو وزارت لخوا په یوه خپره شوې خبرپاڼه کې راغلي چې د اسرائیلي ځواکونو لخوا د الاقصی جومات، د مسلمانانو لومړۍ قبلې، په لمونځکوونکو او ملکي وګړو باندې وروستي بریدونه په کلکه غندي او هغه له تاوتریخوالو څخه ډک، تیری او د سیمې او نړۍ د سولې او ثبات لپاره ګواښ ګڼي.
سرچینې زیاته کړې، افغانستان اسلامي جمهوري دولت د ملګرو ملتونو د امنیت شورا ١٩٦٧ پریکړه لیک کې د مشخص شويو سرحدونو سره سم، د یوه خپلواک هېواد لرلو لپاره د فلسطین د خلکو د برحقې داعیهٔ څخه ملاتړ کوي او د تاوتریخوالي پای او د کړکیچ سوله ایزې حل لپاره، د خبرو اترو او نړیوالو هڅو باندې ټینګار کوي.
د ا سراييلي پوځيانو او فلسطينيانو ترمنځ له تېرو څو ورځو راهيسې اخ وډب روان دى او اسراييلي پوځيان د مسلمانانو پر درېيم ستر او مقدس جومات الاقصى باندې هم بريدونه کړي دي چې له امله يې تر ٥٠٠ زيات کسان ټپيان شوي دي.
تر ياد اخ و ډب وروسته د فلسطين د حماس ډلې له غزې څخه پر اسراييلي سيمو راکټي بريدونه کړي، چې له امله یې پنځه اسراییليان وژل شوي دي.
بلخوا په غزه کې د فلسطين د حماس ډلې د روغتيا څانګې ويلي چې له تېرو دوو ورځو راهيسې د اسرايلي ځواکونو په هوايي بريدونو کې د ماشومانو په ګډون ۵۶ تنه وژل شوي او۳۳۵ نور نور ټپيان شوي دي.
د ملګرو ملتونو د امنيت شورا په فلسطين کې رامنځته شوى تاوتريخوالى غندلى او د بېړني اوربند غوښتنه يې کړې ده.
Visits: 580
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن