کابل (پژواک، ۲۸ غویی ۱۴۰۰) : ستره محکمه وایي چې د عامې روغتیا وزارت کې د فساد په جرم درې تنه په بند او نغدي جریمې محکوم شوي دي.
دسترې محکمې ویاند احمد فهیم قویم د غویي په ۲۸مه، پژواک اژانس ته وویل چې ددرنو جرمونوپر ضد د مبارزې د ځانګړې محکمې ابتداییه محکمه هر یو احمد شکران عثماني او فریدون سلطاني په لسو کلونو او یوې میاشتې بند محکوم کړل.
هغه زیاته کړه چې دغه راز به دوی د اخیستل شوي رشوت په اندازه په نغدي پیسې جریمې هم محکوم شول.
قویم وویل چې د حامد حمیدي په نامه بل تن چې په دې قضیه کې یې مرسته کړې وه، خو نیغ په نیغه پکې ښکیل نه وو، په دوه نیم کلونو محکوم شوی او د احمد کاوه په نامه بل تن ته برايت ورکړل شوی دی.
شاوخوا پنخه میاشتې مخکې (۸ مرغومی ۹۹) ملي امنیت له لویې څارنوالۍ سره په ګډه د عامې روغتيا د هغه مهال د وزیر احمد جواد عثماني د ورور په ګډون څلور تنه په دغه وزارت کې د بډو اخيستو په تور نيولي وو.
سرچینې ویلي وو، چې دغو کسانو د وزارت له ولایتي رئیسانو څخه د رشوت غوښتنه کوله چې د ملي امنیت او لوی څارنوالۍ لخوا نیول شوي دي.
سرچینه وایې په یادو کسانو کې د عامې روغتیا د وزیر ورور احمد شکران عثماني چې وزارت کې کومه رسمي دنده یې نه لرله ، د تره زوی کاوه سرمست زاده، د خاله زوی حامد حمیدي فرامز او د وزارت ارشد سلاکار فریدون سلطاني شامل دي.
بل لورته د عامې روغتیا وزارت یوې بلې سرچېنې پژواک ته ویلي وو چې د فریدون سلطاني د رشوت غوښتنې غږونه لویې څارنوالۍ ته په لاس ورغلي و او د هماغه پر بنسټ دوی دغه کسان نیولي دي .
تر یادې قضیې وروسته ولسمشر اشرف غني د عامې روغتیا د هغه مهال وزیر عثماني له دندې لرې کړی و.
Visits: 837
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن