کابل (پژواک، ٥ غويى ١٤٠٠): په کابل کې د اسټراليا سفير د افغانستان د کورنيو چارو سرپرست وزير ته ډاډ ورکړی چې له افغان ملي پوليسو سره به خپلې مرستې چټکې کړي.
د کورنيو چارو وزارت له خوا د غويي په ٥مه په يوه خپره شوې خبرپانه کې راغلي چې په کابل کې د اسټراليا سفير پاول وُیچِخُسکي پرون د کورنيو چارو له سرپرست وزير حيات الله حيات سره وليدل.
سرچينې زياته کړې چې په دې ليدنه کې حيات له افغانستان، په ځانګړي ډول ملي پولیسو سره د اسټراليا د مرستو له امله مننه وکړه او د هغو پر دوام یې ټینګار وکړ.
په خبرپاڼه کې راغلي، د کورنيو چارو سرپرست وزير د اسټرالیا سفیر ته ډاډ ورکړ چې د سفارتونو، سیاسي نماینده ګیو او بهرنیو ډیپلوماتانو امنيت خوندیتوب د کورنیو چارو وزارت کاري لومړیتوب دی او په دې برخه کې دې اندېښنه نه کېږي.
د اسټراليا سفیر پاول وُیچِخُسکي د ملي پولیسو، په ټوله کې د افغان امنیتي او دفاعي ځواکونو وړتیاوې او لاسته راوړنې وستایلې او په بېلابېلو برخو کې یې له دغو ځواکونو سره د همکاریو د دوام او چټکتیا ډاډ ورکړ.
هغه مننه وکړه چې د سفارتونو او بهرنیو ډیپلوماتانو امنیت تامین د کورنیو چارو وزارت کاري لومړیتوب دی، څو د هېوادونو ترمنځ د ستراتیژیکو اړیکو او همکاریو چټکتیا ته زمینه برابره شي.
د کورنيو چارو وزارت وايي چې اسټراليا د ملي پولیسو د ښوونې او روزنې، ظرفیت لوړونې، تجهیز او تمویل او يو شمېر نورو برخو کې له کورنیو چارو وزارت سره همکاري کوي.
د يادونې ده، اسټراليا د امنيتي ملحوظاتو له امله په موقت ډول له راتلونکې جمعې ورځې په کابل کې د خپل سفارت تړلو اعلان کړى دى.
