جلال اباد (پژواک، ۱۰ غبرګولی ۱۴۰۰): د ننګرهار په دوربابا ولسوالۍ کې د دوربابا په نوم تاريخي زيارت چې په سيمه کې يې ډېر عقيدت مندان لري، په دې وروستيو کې د نا امنيو له امله د خلکو ورتګ کم شوی دی.
خلک د بې اولادۍ او نورو ډېرو ناروغيو د ښه کېدو په نیت دغه زيارت ته ورځي او هلته دعا کوي.
ځايي خلک وايي، دوربابا چې اصلي نوم يې سيد عبدالله دی، نږدې پنځه سوه کاله مخکې له عراق څخه راغلی او دلته دېره شوی دی.
دغه کس چې کله ژوندی و، خلک به د دم او تعویذ لپاره ورتلل، له مړینې وروسته یې هم عقیدت مندان ډېر دي او د خپلو ستونزو هواري په موخه د دعا لپاره د هغه زیارت ته ورځي.
د دوربابا ولسوالۍ يو قومي مشر انورشاه وايي، د دوربابا زيارت ته د شينوارو پر شپږو ولسواليو سربېره د يو شمېر نورو<img class="alignleft wp-image-400339 " src="https://pajhwok.com/wp-content/uploads/2021/05/اجساد-دور-بابا-ننگرهار.jpg" alt="" width="317" height="146" /> ولسواليو او حتی د کوزې پښتونخوا له لواړګي سيمې هم خلک راتلل.
هغه پژواک اژانس ته وويل، د دغه زيارت مينه والو له ډېر پخوا راهيسې چې موټر نه وو، په خپلو پښو به دغلته راتلل، د زيارت ترڅنګ به يې مېلې هم کولې او په زيارت کې به يې د خپلو ستونزو د حل لپاره دعاوې کولې.
يو بل قومي مشر حاجي باندر وايي، په لومړيو کې يې خپله دم او تعويذونه کول خو کله چې مړ شوی، زيارت پرې جوړ شوی او ډلې ډلې خلک زيارت ته ورته راځي.
د دوربابا يو بل اوسېدونکی صبرګل وويل چې د تېرو څو کلونو نا امنيو دغه زيارت ته د خلکو ورتګ کم کړی او هغه لنګر (د خوړو پروګرام) چې له کلونو راهيسې دغه زيارت کې روان و، د خلکو د کم ورتګ له امله اوس په ټپه ولاړ دی.
نوموړی د دې ترڅنګ دوربابا ولسوالۍ ته د سړک خرابوالی او د لارې په اوږدو کې په پرتو ولسواليو کې ناامني نورې هغه ستونزې ګڼي چې په خبره يې، خلک په اسانۍ زړه نه ښه کوي چې دې ولسوالۍ او د زيارت نندارې ته ورشي.
تر ډېره د دوربابا زيارت عقيدتمندان په ننګرهار کې مېشت شينواری دي چې ډېر په احترام ورته قایل دي.
دا په داسې حال کې ده چې ديني عالمان وايي چې زيارتونو ته تګ يواځې هغوى ته د دعا لپاره جواز لري، هلته غوښتنې کوي، مالګه يې خوړل او غيره ناروا دي.
