کابل (پژواک، ۲۰ غبرګولی ۱۴۰۰) : د افغانستان د بیارغونې صندوق مشرتابه کمېټې په خپلې کلنۍ غونډه کې د څلورو راتلونکو کلونو لپاره د یاد صندوق نوې ستراتېژۍ تصویب کړه.
د نړیوال بانک له خوا د غبرګولي په ۲۰مه، پژواک اژانس ته په یوه رااستول شوې خبرپاڼه کې راغلي، د افغانستان د بیارغونې صندوق چې د افغانستان دولت د پراختیايي پروګرامونو یوه ستره تمویلونکې سرچینه ده، د ۳۴ هېوادونو او نړیوالو بنسټونو په استازیتوب یې مشري او مدیریت د نړیوال بانک له خوا کېږي.
سرچینې زیاته کړې، د دغه صندوق د مشرتابه کمېټې په کلنۍ ناسته کې د افغانستان دولت رسمي چارواکو او د مرسته کوونکو هېوادونو او نړیوالو ادارو سفیرانو او استازیو ګډون کړی وو.
په خبرپاڼه کې راغلي، ګډون کوونکو لوریو د افغانستان د پراختیايي اجنډا د پرمخ وړلو په موخه د دولت له پروګرامونو څخه د افغانستان د بیارغونې صندوق د مرستو او ملاتړ د څرنګوالي په اړه بحث او خبرې اترې وکړې.
نړیوال بانک ویلي، دغه غونډه په ګډه توګه د افغانستان د مالیې وزارت د سرپرست، محمد خالد پاینده او د سوېلي اسیا هېوادونو لپاره د نړیوال بانک د مرستیال، هارتویګ شېفر له خوا ترسره شوه.
د افغانستان د مالیې وزارت سرپرست، دغې غونډې ته ویلي:" د افغانستان د بیارغونې صندوق له نړیوالو همکارانو سره د افغانستان د اقتصادي پراختیا په برخه کې زموږ د اساسي مباحثو او اړیکو یواځنی اسانتیا برابرونکی بنسټ ګڼل کېږي او د افغانانو لپاره د یوه سوکاله ژوند په برابرولو او د پراختیايي نتایجو په ترلاسه کولو کې د افغانستان د اوږد مهالو هڅو په عملي کېدو کې کلیدي ونډه لري. اوسنیو شرایطو ته په کتلو سره د افغانستان د بیارغونې صندوق مرستې خورا مهمې دي او موږ د نړیوالې ټولنې له بې ساریو او دوامداره مرستو د زړه له کومې مننه کوو."
هغه زیاته کړې، د افغانستان د بیارغونې صندوق د دولت د بودیجې د یو ستر تمویلونکي بنسټ او همدارنګه د افغانستان د سولې او پراختیا د ملي پلان د تطبیق د یو کلیدي عنصر په توګه ګڼل کېږي.
افغان حکومت د افغانستان د بیارغونې صندوق په ملاتړ او د نړیوالو همکارانو په مرسته د فقر او بیوزلۍ په له منځه وړلو، د اړینو خدمتونو وړاندې کولو، د ملکي بودیجې د لګښتونو په تامین او په بېلابېلو برخو کې د بنسټیزو اصلاحاتو تطبیق کې کار کوي.
په دغې غونډه کې د سوېلي اسیا هېوادونو لپاره د نړیوال بانک مرستیال، هارتویګ شېفر ویلي :” د افغانستان د بیارغونې صندوق په نړیوال بانک کې تر ټولو ستر وجهي صندوق دی چې د نړیوالو تمویل کوونکو هېوادونو او ادارو مالي مرستې د یو هېواد لپاره ترلاسه کوي. په داسې حال کې چې افغانستان د کوویډ-۱۹ د زیانونو او منفي اغېزو او له یو مبهم سیاسي وضعیت سره مخامخ دی، د افغانستان د بیارغونې صندوق له افغان حکومت سره د عامه خدمتونو په ترسره کولو او د افغانانو لپاره د اړینو اصلاحاتو د تطبیق په برخه کې خپلو مرستو ته دوام ورکوي. ”
په خبرپاڼه کې راغلي، نوې ستراتیژي چې له ۱۴۰۰ څخه تر ۱۴۰۳ (۲۰۲۱ – ۲۰۲۴) کلونو لپاره د مالي او همکارۍ پروګرام په نوم یادیږي، د افغانستان د بیا رغونې صندوق د پانګونو لپاره یو لارښود چمتو کوي او د افغانستان دولت د پراختیايي پالیسیو او پروګرامونو لپاره د نړیوالو تمویلونکو د ونډه اخیستنې یوه تګلاره وړاندې کوي.
نړیوال بانک ویلي، نوې ستراتېژې چې د افغانستان دولت او د افغانستان د بیارغونې صندوق له تمویل کوونکو سره په ګډه همغږۍ طرحه شوې، د دغه صندوق پروګرامونه په افغانستان کې وضعیت او حالاتو ته په کتلو سره تنظیم کېږي.
له بلې خوا دغه ستراتېژي د افغانستان د سولې او پراختیا د دویم ملي پلان او د افغانستان د ګډون چوکاټ د اصولو په ړنا کې چې د جینوا د ۲۰۲۰ کال په کنفرانس کې تصویب شول، همغږي لري او له مخې به یې د دغه صندوق پروګرامونه انعطاف منونکي وي.
په افغانستان کې د نړیوال بانک د دفتر رییس، هینري کرالي وایي : " په دې موخه چې څنګه به افغانستان د کوویډ-۱۹ ویروس له منفي اغېزو سره مقابله کوي او په راتلونکي کال کې به د پراختیا پر لوري ګام اوچتوي، اړتیا لیدل کېږي چې د افغانستان دولت او نړیواله ټولنه خپلو ګډو همکاریو ته دوام ورکړي. د نړیوال بانک ګروپ به د افغانستان دولت او له نورو پراختیايي شریکانو سره خپلو مرستو او همکاریو ته دوام ورکوي او موږ به اوسنیو سختو شرایطو کې د افغانستان خلکو ته د اړینو خدمتونو په رسونه کې خپل مالي ملاتړ ته ژمن پاتې شو."
په خبرپاڼه کې راغلي، همدارنګه به د افغانستان د بیارغونې صندوق د مشرتابه کمېټې له خوا په افغانستان کې د پراختیايي پروژو د فعالیتونو او پایلو څېړنه تصویب شوه. دغه کار به د افغانستان د بیا رغونې صندوق نړیوالو تمویلونکو ته دا زمینه برابره کړي څو په افغانستان کې موجوده ګواښونه او فرصتونه وپېژني او د راتلونکو کلونو لپاره د دغه صندوق پراختیايي پروګرامونه طرحه او عملي کړي.
