د بشري حقونو کمېسیون: نړیواله ټولنه دې په افغانستان کې د فاجعې مخه ونیسي

کابل (پژواک،۱ چنګاښ ۱۴۰۰) : د افغانستان د بشري حقونو خپلواک کمېسیون د هېواد روان ګډوډ وضعیت ته په کتلو له ښکېلو غاړوغوښتي چې جګړې ودروي، دايمي اوربند ټينګ کړي او د اختلافي مسايلو د هواري او عادلانه سولې ته د رسېدو لپاره د خبرو اترو مېز ته را وګرځي.

د بشري حقونو خپلواک کمېسیون دغه څرګندونې د چنګاښ په لومړۍ نېټه په هغه خبرپاڼه کې کړې چې په هېواد کې د جګړې د لمنې د پراخېدو، د ملکي خلکو د مرګ ژوبلې زياتېدو، د خلکو د شتمنيو، د هېواد د بنسټونو د ويجاړېدو او د سولې پروسې د کمرنګه کېدو په اړه یې خپره کړې ده.

سرچینې زیاته کړې، د جګړې سختېدل او پراخېدل هره ورځ د ملکي مرګ ژوبلې او د هېواد د بنسټونو د لا نړېدو لامل کيږي.

په خبرپاڼه کې راغلي، دغه چاره د ښارونو د اقتصادي محاصرې په څېر د جنګي تکتيکونو په کارولو سره، د خلکو د ملکيتونو د تخريب او د هېواد په بېلابېلو سيمو کې د خلکو د لا ډېر بې ځايه کېدو لامل شوې او په زياتېدونکي ډول د خلکو د ژوند، تګ راتګ او بنسټي توکو لکه غذايي او روغتيايي توکو ته د لاسرسي د حقونو د سلبېدو لامل شوې او د کرونا ويروس د خپرېدو له بحران سره هممهاله يې د افغانستان د خلکو کړاو لا پسې زیات کړی دی.

په خبرپاڼه کې راغلي، د افغانستان د بشر حقونو خپلواک کمېسيون، د مسايلو د هواري لپاره د تر ټولو رغوونکې، اخلاقي او تر ټولو ښې لارې په توګه تل پر خبرو اترو باندې ټینګار کړی او اوس هم په ټول جديت او شدت سره په دې برخه کې پر خپلو دريځونو تاکيد کوي، ځکه چې جګړه د حل لاره نه ده.

دغه کمېسيون يو ځل بيا له ملګرو ملتونو سازمان، په افغانستان کې پر جګړې او سولې له اغېز لرونکو داخلي او نړیوالو سازمانونو او بنسټونو او نړیوالې ټولنې څخه غوښتي، مخکې له دې چې اوسنی اندېښمنوونکی وضعيت د لا ډېرو وژنو، ويجاړۍ او انساني فجايعو لامل شي، له خپلو ټولو امکاناتو، فرصتونو او ظرفيتونو څخه د تاوتريخوالو او جګړې د پای ته رسولو لپاره ګټه پورته کړي.

سرچینې ویلي، په ځانګړي ډول، کمېسيون له ښکېلو غاړو په کلکه غواړي چې د افغانستان د خلکو د هر اړخيز کړاو او مصيبتونو په درک سره، ټوليزې ګټې او مصلحتونه رعايت کړي د خلکو حقونو او ټوليزو غوښتنو ته درناوی وکړي، تاوتريخوالي ودروي او دايمي اوربند ټينګ کړي او د اختلافي مسايلو د هواري او عادلانه سولې ته د رسېدو لپاره د خبرو اترو مېز ته را وګرځي.

په خبرپاڼه کې راغلي، ښکاره ده چې د جګړې لوري له خلکو سره د خپلو تاوتريخولو، ملکي مرګ ژوبلې، د خلکو د ملکيتونو او شتمنيو ويجاړولو، د هېواد د زيربناوو او عامه تاسيساتو نړولو او په ټوله کې د خپلو جنګي جنايتونو او بشر حقونو او بشرپالو بين المللي حقونو پر وړاندې په ټولو شرايطو او وختونو کې ځواب ويونکي او مسوول دي.