ایبک (پژواک، ۱ چنګاښ ۱۴۰۰): د سمنګان امنیه قوماندانۍ په دغه ولایت کې د دوو نومول شوو ولسوالانو په ګډون د ۱۹ طالبانو د وژل کېدو خبر ورکړی؛ خو طالبان دغه ادعا ردوي.
د سمنګان امنیه قوماندانۍ ویاند عبدالمنیر رحیمي وویل چې تېره شپه طالبانو د دغه ولایت د فیروزنخچیر ولسوالۍ پر امنیتي پوستو برید وکړ.
د هغه په خبره، دغه برید په شا تمبول شوی او د دولت په هوایي بریدونو کې د فیرزونخچیر ولسوالۍ لپاره نومول شوی ولسوال قاري قادر، د دره صوف پایین ولسوالۍ لپاره نومول شوی ولسوال قاري ظریف په ګډون ۱۹ طالبان وژل شوي او د طالبانو يوه اندازه وسلې او مهمات له منځه تللي دي.
هغه له جزئیاتو پرته وویل چې په دغه نښته کې دولتي ځواکونو ته هم مرګ ژوبله اوښتې ده.
د فیرزو نخچیر ولسوالۍ یوه اوسېدونکي چې له نوم اخیستو يې ډډه کوله وویل، په دغه نښته کې طالبانو ته مرګ ژوبله اوښتې، څلور دولتي کسان هم وژل شوي او یو بل یې ټپي شوی دی.
خو د طالبانو یوه ویاند قاري یوسف احمدي په فیرزونخچیر ولسوالۍ کې د هغوی برید په شا تمبول او د دوی کسانو د مرګ ژوبلې خبره بې اساسه بولي.
