جلال اباد (پژواک، ۱۰ چنګاښ ۱۴۰۰): د ننګرهار په مرکز جلال اباد ښار کې ناپېژاندو وسله والو يو انجنیر وژلی دی.
د ننګرهار د امنيه قوماندانۍ وياند فريد خان د چنګاښ په ۱۰مه پژواک اژانس ته وويل چې نن سهار شاوخوا ۸ بجې د جلال اباد ښار د درېيمې ناحيې اړوند ارزاقو کوڅې سيمه کې يو انجنیر وژل شوی دی.
هغه که څه هم د وژل شوي انجنیر د هويت په تړاو معلومات نه درلودل، خو وايي بريد ناپېژاندو وسله والو کړی دی.
د امنیې قوماندانۍ د وياند په خبره، پوليس سيمې ته رسېدلي او د پېښې په اړه یې پلټنې پيل کړې دي.
د تميم په نوم د پېښې يو عيني شاهد پژواک ته وويل چې بريدګر تر ډزو وروسته له سيمې وتښتېدل.
د دغې پېښې مسووليت تراوسه چا نه دی منلی.
