کابل (پژواک، ۱۵ چنګاښ ۱۴۰۰) : هندي رسنیو خبر ورکړی چې پولیسو په پلازمېنې نوي ډیلي کې څلور افغانان له ۱۷ کیلو ګرامه هیروئینو سره نیولي دي.
د هندوستان د پنجاب ولایت پولیسو د چنګاښ په ۱۵مه، رسنیو ته ویلي چې دغه کسان یې پرون د نوي ډیلي په سوېلي برخه کې نیولي دي.
سرچینې زیاته کړې، له دوی سره ۱۷ کیلو ګرامه هیروئین نیول شوي چې په نړیوال مارکېټ کې یې ارزښت ۹۰۰ میلیونه هندۍ کلدارې دی.
د پنجاب د پولیسو مشر ډینکار ګوپتا ویلي چې د استخباراتي معلوماتو په اساس دغه علمیات ترسره شوي او نیول شوي کسان مجاهد شینواری، محمد لعل کاکړ، جنت ګل کاکړ او سمیع الله افغان نومېږي چې د کندوز ولایت اوسېدونکي دي.
هغه زیاته کړې چې له نیول شوو کسانو څخه پوښتنې پیل شوې دي.
ګوپتا ویلي چې پولیسو له تېرو څو ورځو راهیسې لومړی واړه واړه قاچاقبران ونیول او د هغوی په ښودنه یې دغه غټه ډله ونیوله.
خو د پولیسو دغه مشر نه دي ویلي چې یادو افغانانو یاده اندازه هیروئین له کومو لارو هندوستان ته وړي وو.
د یادونې ده چې تر دې مخکې هم هندي پولیسو ګڼ شمېر افغانان له نشه یی توکو سره نیولي دي.
