کابل (پژواک،۱۵چنګاښ ۱۴۰۰): د افغانستان ملي امنیت سلاکار راتلونکې اوونۍ کې افغان امنیتي ځواکونو ته د اووه چورلکو د سپارلو خبر ورکوي او وايي چې د سقوط شوو سیمو د بېرته نیولو لپاره پلان جوړ شوی او عملي کېږي.
دا په داسې حال کې ده چې په وروستیو دوو اوونیو کې د هېواد په بېلا بېلو ولایتونو کې شاوخوا ۱۵۰ ولسوالۍ طالبانو نیولې دي.
د افغانستان د ملي امنیت سلاکار حمدالله محب نن په کابل کې یوه خبري ناسته کې د سقوط شوو سیمو د بېرته نیولو لپاره د پلان جوړېدو او تطبیق خبر ورکړ، خو په دې اړه یې نور جزییات ور نه کړل.
هغه د ولسوالیو سقوط ته په اشاره وویل: ((د طالبانو دغه څو ورځني تکتیکي پرمختګونه په دې مانا نه دي چې خلک دوی ومني. خلک د ځان دفاع ته حاضر دي او طالب لویه تېروتنه کوي چې فکر کوي خلک ورته تسلیمېږي.))
هغه زیاته کړه، تمه دا وه چې د بهرنیو ځواکونو تر وتلو وروسته داسې پلمه نه پاتې کېږي چې طالبان یې له مخکې جګړې ته دوام ورکړي، خو برعکس طالبانو جګړه سخته کړه.
هغه وویل: ((طالبانو نه یوازې نااعلان شوې جګړه کړې، بلکې لا نوره یې سخته کړې ده.))
د نوموړي په خبره، د افغان دولت مرکچي پلاوی دوحه کې خبرو ته تیار دی، خو طالبانو جګړې ته مخه کړې او په دې شرایطو کې خلک مجبورېږي چې له ځانه دفاع وکړي.
هغه وویل، هغه خلک چې د طالبانو پر ضد یې وسله پورته کړې د حکومت په چوکاټ کې جذبېږي.
محب وویل: ((موږ د دغه وضعیت د کنټرول لپاره کار کوو، د ولسوالیو او امنیه قوماندانیو ودانۍ ژر له طالبانو بېرته نیسو.))
نوموړي زیاته کړه چې دولتي ځواکونو په تېره یوه اوونۍ کې ۱۴سقوط شوې ولسوالۍ بېرته له طالبانو نیولې دي.
هغه دغه راز وویل چې ۲۳۰۰ امنیتي ځواکونه چې د بېلا بېلا لاملونو له امله یې وسله پر ځمکه ایښې وه بېرته د جلب او جذب مرکز ته راغلي چې د امنیتي ځواکونو په لیکو کې شامل شي.
نوموړي وویل، راتلونکې اوونۍ افغان امنیتي ځواکونو ته اووه بلک هاک چورلکې سپارل کېږي او ورپسې نورې هغه الوتکې چې نړیوالې ټولنې په ځانګړې توګه امریکا یې ژمنه کړې افغان امنیتي ځواکونو ته سپارل کېږي.
هغه زیاته کړه: ((په تېرو دوو اوونیو کې د هېواد په هوايي ځواکونو کې جدي بدلونونه رامنځته شوي او د دغو ځواکونو فعالیت د امنیت پر ټینګښت متمرکز شوی دی.))
هغه یوې پوښتنې ته په ځواب کې وویل: ((د سیمې هېوادونه د افغانستان د وضعیت په اړه اندېښمن دي او د ناامنیو په ځانګړې توګه د کندوز ولایت شېرخان بندر او بدخشان ولایت کې د ناامنیو پر ډېرېدو اندېښمن دي، له همدې امله تاجکستان تصمیم لري چې د اندېښنو د لرې کولو لپاره یو شمېر نظامیان له افغانستان سره پر پوله مېشت کړي.))
محب په نننۍ ناسته کې له رسنیو او خلکو وغوښتل چې د دولت د وسله والو مخالفینو د «تبلیغاتو برخه» نه شي.
هغه زیاته کړه: ((د جمهوریت په دستګاه کې نیوکه ازاده ده، خو په مقابل طرف کې هېڅ نیوکه نشته، تبلیغ یوازې طالب نه کوي، بلکې دلته د بیان ازادۍ څخه په استفاده هر څوک خبرې کوي، تاسو (رسنۍ) د جمهوریت یوه برخه یاست، ځینې کسان د ډار له وجې اوازې خپروي... د طالبانو د تبلیغاتو تر شاه یوه منظمه دستګاه فعالیت کوي او له بېلا بېلو اکونټونو څخه په استفاده تبلیغاتو ته لمن وهل کېږي.))
