میدان ښار (پژواک، ۱۳ زمری ۱۴۰۰): حکومتي سرچینې وایي، تېره شپه میدان ښار کې د طالبانو برید کې اتو دولتي سرتېرو ته مرګ ژوبله اوښتې او څلور ملکیان ټپیان دي، خو طالبان وایي چې په دغه برید کې ۱۵ دولتي سرتېري وژل شوي دي.
د ميدان وردګو امنیه قوماندان سمونوال محمد مصطفی مايار پژواک خبري اژانس ته وويل چې طالبانو تېره شپه د دغه ولایت په مرکز کې پر «کمربندي پوسته» موټربم او وسله وال برید وکړ.
دی وایي، له موټربم وروسته- چې شاوخوا یوه بجه وشو- د دولتي ځواکوانو او طالبانو ترمنځ د نن سهار تر شاوخوا څلورو بجو جګړه روانه وه.
د ده په وینا، په دغه برید او نښته کې یو دولتي سرتېری وژل شوی، اووه نور ټپیان دي او پوسته له منځه تللې ده.
د دغه ولایت د عامې روغتيا ریاست مشر ډاکتر محمد سالم اصغرخېل پژواک ته وویل چې له دغه بریده څلور ټپيان چې یوه ښځه او نور سړي دي، دغه روغتون ته ور وړل شوي دي.
هغه وایي چې د ټپیانو ټپونه ژور نه دی.
د ميدان ښار یوه اوسېدونکي احسان ستانکزي وويل چې یاده چاودنه ډېره درنه وه او د ځینو کورونو ښیښې يې هم ماتې کړې دي.
دی وایي د جګړې د مرګ ژوبلې په اړه معلومات نه لري، خو یاده پوسته په بشپړ ډول له منځه تللې ده.
د طالبانو ویاندویانو تر اوسه په دې اړه څه نه دي ويلي، خو یو سیمه ییز طالب چې نه غواړي نوم یې څرګند شي، وايي چې په یاد موټربم بريد او جګړه کې ۱۵ امنیتي سرتېري وژل شوي او شپږ نور طالبانو ژوندي نیولي دي.
