کندهار (پژواک، ۱۴ زمری ۱۴۰۰): په کندهار کې لا هم جګړه روانه ده چې له امله یې په تېرو ۲۴ ساعتونو کې درې ملکي وګړي وژل شوي او ۲۲ تنه نور ټپيان شوي دي.
د کندهار د میرویس حوزوي روغتون آمر ډاکټر محمد داوود فرهاد پژواک خبري اژانس ته وویل، په کندهار ښار او نورو سیمو کې د روانې جګړې له امله روغتون ته ۳ جسدونه او ۲۲ تنه ټپيان ور وړل شوي دي.
هغه زیاته کړه، جسدونه او ټپيان د کندهار ښار له ۷مې ناحيې، ۸مې ناحیې، سرپوزې، میربازار، کرز، سنځري، حاجي عرب سیمو؛ ارغنداب او سپين بولدک ولسوالیو څخه راوړل شوي دي.
دی وايي، د درېیو تنو وژل شوو له ډلې ۲ یې ملکي وګړي او یو ناپېژاند کس دی، دغه راز د ۲۲ ټپيانو له ډلې ۴ ماشومان، ۵ ښځې او پاتې نارینه دي.
د ده په خبره، په ټپیانو کې ۱۰ تنه پر مرمیو، ۹ تنه د هاوان مرمیو پر چرو او ۳ تنه د ماین د چاودنې له امله ټپیان شوي دي.
د یادونې ده چې تېره ورځ ۲۱ ملکي وګړو ته مرګ ژوبله اوښتې وه چې ۳ تنه وژل شوي وو او ۱۸ ټپيان شوي وو.
په کندهار کې د روانې جګړې په لړ کې تېره شپه امریکايي او افغان هوايي ځواکونو د ښار په بېلابېلو سیمو کې بریدونه کړي دي.
یوې امنیتي سرچینې پژواک خبري اژانس ته وویل، تېره شپه د ملي امنیت صفر درې قطعې د کندهار ښار د ۱۵مې امنیتي حوزې په ناصرانو کلي کې عملیات کړي او د دواړو لورو تر منځ سخته جګړه شوې ده.
سرچینه زیاتوي، د عملیاتو پر مهال د امریکا هوايي ځواک بمبار کړی چې په پایله کې یې ۱۵ وسله وال وژل شوي دي.
دغه راز د ښار د ۷مې امنیتي حوزې اړوند په میرویس مېنه او میربازار سیمو کې هم عملیات شوي چې د سرچینو په خبره، د کندهار لپاره د طالبانو د والي نظامي مرستیال نسیم زرقاوي په کې ټپي شوی دی.
د دې تر څنګ هوايي ځواکونو د کندهار ښار د ۱۵مې امنیتي حوزې او ډنډ ولسوالۍ تر منځ د خلقي پول په سیمه کې هم هغه مهال هوايي برید کړی چې وسله والو پر یوې امنیتي پوستې برید وکړ.
په دغه برید کې د ۳ وسله والو د وژل کېدو خبرونه تر لاسه شوي دي.
په کندهار کې د ۲۰۵ اتل قول اردو ویاند جګړن صادق عیسی پژواک ته وویل، تېره شپه دفاعي او امنیتي ځواکونو د هوايي ځواک په ملاتړ د ښار د ۷مې امنیتي حوزې او ډنډ ولسوالۍ په یو شمېر سیمو کې وسله وال په نښه کړي دي.
دی وايي، د عملیاتو په پایله کې ۱۶ وسله وال وژل شوي او ۱۰ نور ټپیان شوي دي.
خو طالبان ردوي چې ګواکې دوی ته دې په دې بریدونو کې مرګ ژوبله اوښتې وي.
چارواکي خبر ورکوي چې په کندهار ښار کې یې پرېکنده عملیات پيل کړي څو وسله وال له نیول شوو ځایونو پر شا کړي.
له همدې امله چارواکي خلکو ته خبر ورکوي څو له هغو سیمو چې طالبان په کې ځای پر ځای شوي، خپلې کډې خوندي سیمو ته ولېږدوي چې زیان ور وا نه وړي.
تېره ورځ د کندهار والي روح الله خانزاده، په ولسي جرګه کې د کندهار یو شمېر استازو او د ملي امنیت عمومي ریاست مرستیال په کندهار ښار کې د عملیاتو په اړه د ۲۰۵ اتل قول اردو له مسوولینو سره ناسته لرله.
په ولسي جرګه کې د کندهار د خلکو استازی ګل احمد کمین وايي، د امنیتي مسوولینو ستونزې یې اورېدلي او د حل په موخه یې په مرکز کې له اړوندو چارواکو سره شریکوي.
دی وايي، کندهار ته له خوست ولایت څخه ځانګړي ځواکونه راغلي چې د ملي اردو او ملي پولیسو په ملتیا په دې ولایت کې ځانګړي عملیات پیلوي چې په پایله کې به یې کندهار ښار او ولسوالۍ د وسله والو طالبانو له ولکې ایستل شي.
شاوخوا یوه میاشت کېږي چې د کندهار ښار په اووه ناحیو کې د امنیتي ځواکونو او وسله والو طالبانو تر منځ جګړه روانه ده.
د جګړې له امله تر دې مهاله سلګونو ملکي وګړو ته مرګ ژوبله اوښتې ده او ۲۴ زره کورنۍ له خپلو کورونو کډې کولو ته اړې شوې دي.
د کندهار ښار اوسېدونکي او د جګړې له امله بې ځایه شوي کډوال چې د جګړې دوام سخت ځپلي له حکومت څخه غوښتنه کوي چې جګړه له کندهار ښاره وباسي څو هغوی د ارام ساه واخلي او بېرته خپلو کورونو ته ستانه شي.
