کندهار (پژواک، ۱۵ زمری ۱۴۰۰): په کندهار ښار کې د روانې جګړې له امله د ښځو او ماشومانو په کډون ۱۰۷ تنو ملکي وګړو ته مرګ ژوبله اوښتې ده.
د کندهار د میرویس حوزوي روغتون آمر ډاکټر محمد داوود فرهاد پژواک خبري اژانس ته وویل، له شنبې بیا تر نن جمعې ورځې دغه روغتون ته ۱۷ جسدونه او ۹۰ تنه ټپيان ور وړل شوي چې ټول ملکي وګړي دي.
هغه زیاته کړه، وژل شوي ټول نارینه دي خو په ټپيانو کې ۱۲ ښځې، ۲۳ ماشومان او ۵۵ نارینه شامل دي.
دی وايي، دغو ملکي وګړو ته ډېره مرګ ژوبله د مرمیو او هاوانونو د لګېدو له امله اوښتې ده خو یو شمېر کسان د ماین چاودنو هم مړه او ژوبل کړي دي.
فرهاد وویل، له هغه وروسته چې د کندهار ښار په بېلابېلو ناحیو کې جګړه پیل شوې، دغه روغتون ته د ټپیانو ور وړل ډېر شوي چې له امله یې دغلته بېړنی حالت اعلان شوی دی.
د ده په خبره، میرویس حوزوي روغتون چې د سوېل زون په کچه فعالیت کوي د عادي ناروغانو تر څنګ د جګړې او ترافیکي پېښو ټپيان هم ورته راوړل کېږي، خو دا چې په دې وروستیو کې پر دغه روغتون د ټپیان هجوم ډېر شوی، دغه روغتون یوازې د جګړې د ټپیانو درملنې ته ځانګړی شوی.
ډاکټر فرهاد وايي، نور ناروغان د کندهار ښار د عینو مېنې ۳۵۰ بستریز روغتون ته د درملنې لپاره لېږل کېږي.
په روانه جګړه کې هره ورځ ګڼ شمېر سرتېرو ته هم مرګ ژوبله اوړي خو کره شمېرې یې په لاس کې نشته.
دا په داسې حال کې ده چې تېره اوونۍ په کندهار کې د جګړې له امله ۲۴ ملکي وګړي وژل شوي وو او ۱۱۶ تنه نور ټپيان شوي وو.
په کندهار کې د بشر حقونو خپلواک کمېسیون په کندهار کې د ملکي مرګ ژوبلې د ډېرېدو په اړه اندېښنه ښيي او وايي، تر بل هر وخت په کندهار کې د ملکي مرګ ژوبلې کچه لوړه شوې ده.
بل خوا په کندهار کې د بشري حقونو خپلواک کمېسیون هم وايي چې د جګړي اصولو د نه مراعتولو له امله په دې وروستیو کې تر بل هر وخت د ملکي مرګ ژوبلې کچه لوړه شوې ده.
د دې ادارې مسوول سلطان محمد عایل پژواک خبري اژانس ته وویل، له بده مرغه د جګړې د نړیوالو بشري قوانینو د نه مراعتول د دې لامل شوی چې د ملکي مرګ ژوبلې کچه لوړه شي.
د ده په خبره، د امکان تر بریده یې هڅې کړي چې د ملکي مرګ ژوبلې کچه راټیټه شي.
د کندهار ښار اوسېدونکي وايي، جګړه د دوی په کلیو او د استوګنې په سیمو کې روانه ده چې له امله يې د دوی سر او مال خوندي نه دي.
د کندهار ښار د میرویس مېنې یوه اوسېدونکي جاوید احمد پژواک ته وویل، جګړه تر بل وخت تونده شوې او د دوی کلي او کورونه د جګړې په ډګر بدل شوي دي.
دی زیاتوي، طالبان په لارو کې ماینونه ږدي او د خلکو له کورونو د سنګرونو کار اخلي، دواړه لوري پر یوه او بل د سپکو او درنو وسلو انداختونه کوي، امنیتي ځواکونه بمبار کوي چې په دې ټولو مواردو کې تر ټولو ډېره مرګ ژوبله ملکي وګړو ته اوړي.
نوموړی د جګړې له ښکېلو غاړو غوښتنه کوي چې د ملکي وګړو خوندیتوب ته پام وکړي.
امنیتي چارواکو او وسله والو طالبانو ملکي وګړو ته د اوښتې مرګ ژوبلې په اړه څه نه دي ویلي.
شاوخوا یوه میاشت کېږي چې د کندهار ښار په اووه ناحیو کې د امنیتي ځواکونو او وسله والو طالبانو تر منځ جګړه روانه ده.
د جګړې له امله تر دې مهاله سلګونو ملکي وګړو ته مرګ ژوبله اوښتې ده او ۲۴ زره کورنۍ له خپلو کورونو کډې کولو ته اړې شوي دي.
د کندهار ښار اوسېدونکي او د جګړې له امله بې ځایه شوي کډوال چې د جګړې دوام سخت ځپلي له حکومت څخه غوښتنه کوي چې جګړه له کندهار ښاره وباسي څو هغوی د ارام ساه واخلي او بیرته خپلو کورونو ته ستانه شي.
