کابل (پژواک، ۳۱ زمری ۱۴۰۰): د انعکاس په نوم يوه خصوصي ټلويزيون مشر وايي چې وسله والو کسانو يې په کابل کې پر کور چاپه وهلې، د زرهي موټر په ګډون يې درې موټر او دوه لپټاپ کمپيوټرونه ترې وړي دي.
انعکاس ټلوېزيون چې په ننګرهار ولايت کې يې له تېرو درېيو کلونو راهيسې نشرات کول، دا تېره مياشت يې د امنيتي ګواښونو له امله خپل نشرات وتړل.
د دغه ټلويزيون مشر انجنیر زلمی چې اوس یې يو خوندي ځای کې ځان پټ کړی، پژواک اژانس ته د ټیلېفون په لیکه وويل، يو شمېر وسله والو یې د کابل ښار د ۱۲مې ناحيې اړوند ارزان قيمت سيمه کې پر کور چاپه اچولې ده.
هغه زياتوي، د وسله والو له ورتګ سره سم يې په سيمه کې د طالبانو له امنيتي مسوول سره اړيکه کړې، هغه هم چټک ځان رسولی خو کله چې ور رسېدلی وايي په شته کسانو يې زور نه دی رسېدلی.
د نوموړي په وينا، وروسته یې وسله وال کسان کور ته دننه شوي، له پلټنو وروسته يې د ده شخصي زرهي او دوه نور شخصي موټر له ځان سره بیولي.
د انجنیر زلمي د معلوماتو له مخې، له يادو وسله والو دوه کسان بيا ځلي ورغلي چې دوی د ګاونډيانو په کور له خپله کوره وتلي او يادو کسانو ټوله شپه د دوی په کور کې تېره کړې او سهار يې له ځان سره د ده دوه لپټاپ کمپيوټرونه هم وړي دي.
هغه وايي، هغه اوس د کابل په بله سيمه کې د خپلوانو کره ځان خوندي کړی دی، خو د ژورنالېستانو نړیوال فدراسیون په يو بيان کې ويلي چې دغه کړنه وسله والو طالبانو ترسره کړې ده.
په کابل کې حاکمو طالب چارواکو تر اوسه په دې اړه څه نه دي ويلي.
