کندهار (پژواک، ۸ تله ۱۴۰۰): د کندهار په سپین بولدک ولسوالۍ کې د دروازې د افغان او پاکستاني ساتونکو تر منځ شخړه شوې او وروسته لار د تګ راتګ پر مخ تړل شوې ده.
پېښه نن تر غرمې مخکې هغه مهال وشوه چې پاکستاني لوري له یو شمېر افغان ناروغانو او ټپیانو سره- چې د درملنې په موخه له دروازې اوښتل- ناسم چلند وکړ.
د کندهار د والي مطبوعاتي مسوول مولوي عزام پژواک خبري اژانس ته وویل، یو شمېر ټپیان او ناروغان چې غوښتل یې د درملنې لپاره پاکستان ته لاړ شي، د پاکستاني ځواکونو له خوا وهل شوي او سخت چلند ورسره شوی دی.
هغه زیاته کړه، د دې پېښې پر سر د طالبانو او پاکستاني ځواکونو تر منځ لفظي شخړه شوې او لار تړل شوې ده.
دی وايي، شخړه یوازې لفظي وه او کوم چا ته په کې زیان نه دی اوښتی.
نوموړي وویل، له پېښې وروسته طالبانو لار خلاصه کړې خو پاکستاني ځواکونو لا هم تړلې ده.
خو په سپین بولدک کې یوې باوري سرچینې پژواک خبري اژانس ته وویل، د دواړو لورو تر منځ له لفظي شخړې وروسته فزیکي شخړه شوې او یو بل یې د وسلو په کنداغونو وهلي دي.
د یادې شوې سرچینې د معلوماتو له مخې، په دغه اخ او ډب کې درې پاکستاني سرتېري ټپيان شوي دي.
خو پاکستاني لوري په دې اړه تر اوسه کوم وضاحت نه دی ورکړی.
دغه سرچینه زیاتوي، اوسمهال لار تړلې ده او د ډیورنډ فرضي کرښې په دواړو غاړو کې په زرګونو خلک ایسار دي.
له هغه وروسته چې طالبان په افغانستان کې واکمن شوي، پر دغه لار د خلکو تګ راتګ په بې ساري توګه ډېر شوی چې پاکستاني لوري یې پر وړاندې ګڼ محدودیتونه لګولي دي.
پخوا د سپین بولدک- چمن لار د سهار په ۷:۰۰ بجې پرانیستل کېدله او د مازدیګر په ۶:۰۰ بجې تړل کېدله خو اوس دغه لار د سهار په ۸:۰۰ بجې پرانیستل کېږي او د مازدیګر په ۴:۰۰ بجې تړل کېږي.
له همدې امله پر دغه لار نه یوازې خلک له سختو ستونزو سره مخ دي، بلکې سوداګري او راکړه ورکړه یې هم اغېزمنه کړې ده.
