<strong>کابل(پژواک، </strong><strong>۱۴</strong> <strong>تله </strong><strong>۱۴۰۰):</strong> <strong>د روغتیا نړیوال سازمان په داسې حال کې په افغانستان کې د کرونا د ۱،۶ میلیونه دوز واکیسن د ضایع کېدو خبر ورکوي چې طبي پوهان د هغه پر ژر تطبیق ټینګار کوي.</strong>
<strong>د روغتیا نړیوال سازمان ویلي چې که ۱،۶ میلیونه دوزه واکسین ژر تطبیق نه شي، له دې امله چې د پای نېټه یې نږدې شوې، ټول به ضایع شي.</strong>
<strong>دغه سازمان ویلي چې د یاد واکسین د ضایع کېدو د مخنیوي لپاره به د خپلو شریکانو په مرسته د افغانستان په ۱۶ ولایتونو کې کمپاین پیل کړي.</strong>
<strong>په ورته مهال د روغتیای وزارت مخکني سلاکار </strong><strong>بازمحمد ش</strong><strong>ې</strong><strong>رزاد</strong> <strong>اندېښه څرګنده کړه چې که ۱،۶ میلیون دوزه واکسین ژر تطبیق نه شي، ضایع به شي او زیاته یې کړه چې خلک باید وهڅول شي څو دغه واکیسن تطبیق کړي. </strong>
<strong>هغه زیاته کړه: «د یاد واکسین له ضایع کېدو سره به له ۱،۵ میلیونو ډېر هغه افغانان د کرونا پر وړاندې د معافیت له چانس څخه بې برخې شي چې په کرونا ناروغۍ د اخته کېدو له ګواښ سره مخ دي.» </strong>
<strong>نوموړی وایي چې یو دوز واکیسن افغانستان ته په شاوخوا ۳۰ ډالر تمامېږي، که حساب ورته وشي د هغه واکسین لګښت چې د ضایع کېدو له ګواښ سره مخ دی، شاوخوا ۴۸میلیونه امریکایي ډالره کېږي.</strong>
<strong>دغه طبي کارپوه روغتیا وزارت ته وړاندیز وکړ څو له ۵۰ کلونو د لوړ عمر کسان، د متمه ناروغیو لرونکي، د ښار تراسپورټي سکټور او لیني موټر چلوونکي، دوکانداران او د عامه خدماتو وړاندې کوونکي، ژر واکیسن کړي. </strong>
<strong>به رابعه بلخي روغتون کې د داخله ناروغیو ډاکتر سید مسیح الله هاشمي، پژواک خبري اژانس ته وویل چې واکسینونه په ټوله کې د ټاکلې نېټې د تېرېدو او په معینه درجه کې د نه ساتلو له امله ضایع کېږي. </strong>
<strong>هغه زیاته کړه: «د کرونا واکسین باید د تاریخ له تېرېدو مخکې استفاده شي او دغه راز په معینه درجه کې وساتل شي، له دې پرته له ګټې اخیستنې لویږي.» </strong>
<strong>د سرچینې په وینا، روغتیا وزارت باید له ګواښ سره د مخ قشرونو لپاره ژر د واکسین د تطبیق په موخه د پوهاوي پروګرامونه پیل کړي.</strong>
<strong>خو د عامې روغتیا وزارت تراوسه په دې اړه څه نه دي ویلي.</strong>
<strong>د یادونې ده چې له یوې نیمې میاشتې راهیسې په افغانستان کې د کرونا له امله د مړو او ناروغانو په شمېر کې د پام وړ لږوالی راغلی دی.</strong>
