کابل (پژواک، ۲۹ تله ۱۴۰۰): د پاکستان بهرنیو چارو وزیر شاه محمود قریشي او ورسره لوړپوړي پلاوي په کابل کې د افغانستان د نوي سرپرست حکومت له رییس الوزراء سره لیدلي دي.
په کابل کې د پاکستان سفیر منصوراحمد خان پر خپله ټویټرپاڼه ليکلي چې د افغانستان لومړي وزیر ملا محمد حسن اخوند د بهرنیو چارو له وزیر محمود قریشي سره په ارګ کې وکتل.
سرچینه زياتوي: «د دوو وروڼو هېوادونو ترمنځ د دوه اړخیز تعامل، سوداګرۍ، ترانزیټ او خلکو ته د اسانتیاوو برابرولو په اړه دوه اړخیزې خبرې روانې دي.»
د راپورونو پر بنسټ، له دې مخکې د پاکستان بهرنیو چارو وزارت ویلي وو چې قریشي به په دغه سفر کې له يو شمېر نورو افغان چارواکو سره هم وګوري.
سرچينه ليکي، په دغه رسمي سفر کې به دواړه لوري پر دوه اړخیزو اړیکو او د سیمې د سولې او ثبات په اړه د پاکستان پر دریځ هم خبرې وکړي.
په ورته مهال، د اطلاعاتو او فرهنګ وزارت د نشراتي مرستيال ذبيح الله مجاهد سکرتر بلال کريمي ويلي چې افغان او پاکستاني چارواکي به د دوه اړخیزو اړیکو د ودې او پراختیا ترڅنګ په تورخم او سپین بولدک کې د خلکو او سوداګریزو توکو د لېږد رالېږد پر ستونزو هم خبرې ولري.
سرچینه وايي، دواړه لوري به په پاکستان کې د افغان کډوالو پر ستونزو هم بحث وکړي.
دا په داسې حال کې ده چې شاوخوا یوه میاشت مخکې د طالبانو له واکمنېدو څو ورځې وروسته د پاکستان د ای اېس ای مشر جنرال فیض حمید کابل ته راغلی و او د هغه دغه سفر د افغانانو له پراخ غبرګون سره مخ شو.
