کابل (پژواک، ١٥ سلواغه ١٤٠٠): د افغان مېرمنو په چارو کې د امریکا متحده ایالاتو ځانګړې استازې رینا امیري وايي که د افغانستان سرپرست حکومت نړیوال مشروعیت غواړي، باید د افغانانو بشري حقونو ته درناوی وکړي.
دا په داسې حال کې ده چې په افغانستان کې د ملګرو ملتونو مرستندویه پلاوي (يوناما) ویلي چې تیره ورځ یې کابل کې د دوو نورو ښځینه فعالانو د نیول کېدو د راپورونو په اړه يې د کورنیو چارو له وزارت څخه معلومات غوښتي دي.
یوناما ویلي، ملګري ملتونه یو ځل بیا د ټولو «بې درکه» شوو ښځینه فعالانو او د هغوی د دوستانو د خوشي کېدو غوښتنه کوي.
د امريکا غږ د راپور له مخې، د افغان مېرمنو لپاره د امریکا متحده ایالاتو ځانګړې استازې رینا امیري نن د یوناما اندېښنې ته په کتو پر خپل ټویټرپاڼه لیکلي: «دا غیر عادلانه توقیفونه باید ودرول شي. که طالبان له افغان ولس او نړۍ څخه مشروعیت غواړي، نو دوی باید د افغانانو بشري حقونو ته درناوی وکړي. په ځانګړې توګه د ښځو لپاره او د بیان د ازادۍ لپاره.»
نوموړې زیاته کړې، طالبان باید دغه ښځینه فعالانې او خپلوان يې ژر تر ژره خوشي کړي.
بل لور ته حکومت تر دا مهاله په کابل کې د تازه نادرکه شوو ښځینه فعالانو د راپورونو په اړه څه نه دي ویلي.
خو تر دې مخکې د وو تنو نورو ښځینه فعالانو تمنا زریاب پریاني او پروانه ابراهیم خېل د نیول کېدو په اړه راپورونه يې رد کړي دي.
GET IN TOUCH
NEWSLETTER
SUGGEST A STORY
PAJHWOK MOBILE APP