مزارشريف (پژواک، ۱۷ سلواغه ۱۴۰۰): د بلخ په مرکز مزارشریف ښار او بلخ ولسوالۍ کې د سعودي عربستان ملک سلمان بنسټ له لوري له ۸۰۰ بېوزلو کورنیو سره د خوراکي توکو او جامو مرستې وشوې.
دغه مرستې د سرې میاشتې او ياد مرکز له لوري نن ووېشل شوې.
په شمال کې د سرې میاشتې مسوول مولوي یار محمد فاروقي وايي چې دوی لومړی د سرې میاشتې رضاکارانو ټېم له لوري دغه کورنۍ سروې او تشخیص کړې او بیا یې ورسره مرسته کړې ده.
د هغه په وینا، په دغو مرستو کې خوراکي توکي، اوړه، جامې او کمپلې شاملې دي.
نوموړی همدارنګه وايي چې بشري مرستې باید له سیاسي موضوعاتو سره تړلې نه وي او له ټولو بشري مرستندویه سازمانونو یې وغوښتل څو له افغانانو سره مرستې وکړي.
په افغانستان کې د ملک سلمان بنسټ مسوول عبدالقادر هوتخېل وايي چې دغه مرکز په نظر کې لري څو د افغانستان په لرو پرتو سیمو کې چې له ډېرو اقتصادي ستونزو سره لاس او ګرېوان دي، مرسته وکړي.
هغه همدارنګه وايي چې دوی د کندوز، تخار او پروان ولایتونو سربېره نن د بلخ په مرکز مزارشریف او د دغه ولایت د بلخ ولسوالۍ پر ۸۰۰ بېوزلو کورنیو مرستې ووېشلې.
د دغو مرستو ترلاسه کوونکي له دغه وېش څخه خوښي ښيي خو دغه مرستې بسندویه نه بولي.
د بلخ یوه اوسېدونکې محسنه دغه مرسته په داسې حال کې ترلاسه کوي چې د سهار خوړلو لپاره یې په کور کې څه نه درلودل.
سهیلا د یوې بلې بېوزلې کورنۍ غړې ده او وايي چې دا مرستې د دوی لپاره بسنه نه کوي او له نورو نهادونو غواړي څو ورسره مرسته وکړي.
غړيYou need to subscribe to view the full article. Please login or register a new account.
