پلخمري (پژواک، ۳ کب ۱۴۰۰): د بغلان چارواکي وايي، د دغه ولایت په شمالي سالنګ کې د یوې ترافیکي پېښې پایله کې ۳۶ کسان ټپیان شوي دي.
پېښه نن له غرمې وروسته ماپښین درې بجې د ۵۸۰ ډوله مسافر وړونکي بس او ټانکر د ټکر له امله شوې ده.
د بغلان ولایت د ترافیکو مدیر قاري محمد نذیر عابدي پژواک خبري اژانس ته وویل، په شمالي سالنګ کې یوه ۵۸۰ ماډل مسافر وړونکي بس له ولاړ ټانکر سره ټکر کړی چې له امله یې په مسافر وړونکي بس کې سپاره ۳۶ کسان ټپیان شوي دي.
هغه زیاته کړه، موټر چلوونکی تښتېدلی، ټپیان نژدې روغتون ته وړل شوي، که څه هم تر اوسه یې د چا د مړینې خبر نه دی تر لاسه کړی خو امکان شته چې د پېښې ځاني زیان زیات وي.
د خنجان ولسوالۍ باز د موټرو د تمځای مسوول کاکا غلام پژواک خبري اژانس ته وویل، دا ترافیکي پېښه د دې ولسوالۍ د بازار اړوند د سالنګ په ۶ کیلومترۍ کې شوې ده.
دی هم وايي چې په دې پېښه کې ګڼ کسان ټپیان شوي خو څوک مړه نه دي.
د بغلان د عامې روغتیا ریاست ویاند عبدالله ملنګ پژواک خبري اژانس ته وویل، چې د پېښې له ځایه د پلخمري روغتون ته ۱۰ ټپيان ور وړل شوي دي.
دی وايي، نور ټپیان چې کره شمېره یې معلومه نه ده د خنجان ولسوالۍ روغتون ته وړل شوي دي.
د یادونې ده چې تېره شپه هم په شمالي سالنګ کې له سړک څخه د موټر ښویېدو په پېښه کې د پنجشېر ولایت د ټولګټو چارو د رییس په ګډون ۵ کسان ټپیان شوي وو.
په دې وروستیو کې پر دې لار ترافیکي پېښې ډېرې شوې چې لامل یې موسمي حالات او تر ډېره د موټرچلوونکو بې احتیاطي ده.
غړيYou need to subscribe to view the full article. Please login or register a new account.
