<p style="text-align: justify;">غزني (پژواک، ۱۸ کب ۱۴۰۰): په غزني کې د ګازنیونې له امله د یوې کورنۍ درې غړي (پلار، زوی او نږور) مړه شوي دي.</p>
<p style="text-align: justify;">د غزني د اطلاعاتو او فرهنګ ریاست مرستیال منصور افغان پژواک خبري اژانس ته وویل، دا پېښه تېره شپه د غزني ښار اړوند د اوګرې په سیمه کې شوې ده.</p>
<p style="text-align: justify;">هغه زیاته کړه، یوه پلار، زوی او نږور یې په خپله خونه کې ګازي بخارۍ لګولې وه چې د شپې ناوخته ګاز نیولي او ځای پر ځای یې مړه کړه کړي دي.</p>
<p style="text-align: justify;">دی وايي، دا کورنۍ تازه له پاکستانه بېرته راستنه شوې وه او د غزني ښار په اوګرې سیمه کې یې د استوګنې لپاره دوه کوټې جوړې کړې وې چې د دې پېښې ښکار شول.</p>
<p style="text-align: justify;">نوموړی له خلکو غوښتنه کوي چې د ګاز په کارولو کې له احتیاطه کار واخلي څو له داسې بدو پېښو خوندي پاتې شي.</p>
<p style="text-align: justify;">د یادونې ده، هر کال په افغانستان کې د ژمي په موسم کې د ګازنیونې له امله لسګونه کسان خپل ژوند له لاسه ورکوي چې تر ډېره یې لامل بې احتیاطي ګڼل کېږي.</p>
