له زابل وروسته په پکتیکا کې هم د علماوو ولایتي شورا جوړه شوه

ښرنه (پژواک، ۲۱ وری ۱۴۰۱): په پکتیکا کې په یوه تازه ګام کې د علماوو ولایتي شورا جوړه شوه چې د چارواکو په وینا، دنده یې په نظام کې د شرعي نیمګړتیاوو له منځه وړل او د ولس او دولت تر منځ اړیکې ټینګول دي.

د علماوو دغه شورا د مرکز او ولسوالیو له دیني عالمانو جوړه شوې چې ټولټال ۲۰ تنه غړي لري.

په دې اړه له پکتیکا ولایت مقامه په خپره شوې خبرپاڼه کې راغلي چې د علماوو دې ولایتي شورا نن په رسمي ډول خپل کارونه پیل کړل.

سرچینه زیاتوي، شورا مسوولیت لري څو د اسلامي او شرعي احکامو د پلي کېدو لپاره کار وکړي، په ادارو کې د فساد مخه ونیسي، د دولت او ولس تر منځ واټن له منځه یوسي او په سیمه ییزه کچه د خلکو شخړې هوارې کړي.

د یادې شورا یوه غړي مولوي یعقوب پژواک خبري اژانس ته وویل، په ټولنه کې د دیني عالمانو رول مهم او اغېزناک دی؛ نو ځکه هڅه کوي د اسلامي او شرعي احکامو پلي کولو برخه کې کار وکړي.

هغه غوښتنه وکړه چې دولتي ادارې دې د ښې حکومتولۍ په برخه کې له دوی سره مشورې وکړي؛ څو د خلکو ستونزې نېغ په نېغه تر اړوندو ادارو ورسوي.

د ښرنې یوه اوسېدونکي احمد پژواک خبري اژانس ته وویل، د علماوو شورا جوړول ښه ګام دی؛ خو مهمه دا ده چې په دې شورا کې باید قومي مشران او ځیني مدني فعالان هم وای.

د ده په خبره، د دغسې یوې ګډې شورا جوړېدل به د ښې حکومتولۍ په برخه کې ګټور ګام وای.

د سرپرست حکومت له راتلو سره له زابل وروسته پکتیکا دویم ولایت دی چې د علماوو ولایتي شورا په کې جوړېږي.