جلال اباد (پژواک، ۲۳ وری ۱۴۰۱): په ختيځ کې د ۲۰۱ خالد بن وليد قول اردو چارواکي وايي، د امنيت د لا ټينګښت په موخه پر ډېورنډ کرښې د پرتو پوستو او پوځي ځايونو تحکيمات پیاوړي کوي.
چارواکي وايي، پوستو ته د سړکونو جوړول او نورې چارې به د دفاع وزارت بوديجې ته په کتلو پیلوي.
ختيځ زون کې د ۲۰۱ خالد بن وليد قول اردو وياند مولوي وحيد الله محمدي د وري په ۲۳مه پژواک اژانس ته وويل چې د قول اردو قوماندان مولوي عبدالبصير ابودوجانه پرون او نن سهار په ننګرهار، کونړ او نورستان ولايتونو کې پر ډيورنډ کرښه پرتو امنيتي پوستو څخه ليدنه کړې ده.
هغه زياته کړه، د ليدنې پرمهال د قول اردو قوماندان ډيورنډ کرښې ته نږدې سيمو کې د امنيت د لا ټينګښت، د پوستو د استحکاماتو پياوړتيا او يادو سيمو ته د ملي دفاع وزارت په مالي لګښت د سړکونو جوړولو او بيارغونې برخو کې ځايي مسوولينو ته لازمې لارښوونې او سپارښتنې وکړې.
د قول اردو وياند وايي، هېچا ته اجازه نه ورکول کېږي چې د ډيورنډ کرښې دې غاړه کې وسله وال فعاليتونه او يا هم د افغانستان پر خاوره تېری وکړي.
د نوموړي د معلوماتو له مخې اسلامي امارت په تېرو شاوخوا اتو میاشتو کې، ډیورنډ فرضي کرښې شاوخوا له ۴۰ ډېرې پوستې جوړې کړې او سلګونه تازه دم سرتیري په کې ځای پر ځای شوي دي.
د ختيځ زون درې ولايتونه ننګرهار، کونړ او نورستان پر ډيورنډ کرښه پرتې دي چې ډېر کله ترې د وسله والو د تګ راتګ، ناقانونه کړنو او له هغې غاړې پر افغان خاوره د پاکستاني ځواکونو له لوري د توپچي بريدونو راپورونه هم ورکړل شوي دي.
غړيYou need to subscribe to view the full article. Please login or register a new account.
