کابل (پژواک، ۲۶ وری ۱۴۰۱): د امریکا دفاع وزارت پنټاګون ویلي چې اوکراین ته د نورو پوځي وسایلو ترڅنګ یوولس هغه چورلکې هم ورکوي چې افغانستان ته یې ساتلې وې.
د بي بي سي د راپور له مخې، د پنټاګون ویاند جان کربي په واشنګټن کې خبریالانو ته وویل: "دغه یوولس مي۱۷ افغانستان ته په پام کې نیول شوې وې، تیارې موجودې دي، له زېرمو یې را وباسو، دا چې افغانستان ته مو ونه لېږلې نو اوس یې اوکراین ته استوو."
پنټاګون وایي، له دې مخکې د تېر کال په وروستیو کې هم افغانستان ته ځانګړې شوې پنځه ورته چورلکې اوکراین ته ورکړل شوې دي.
امریکا له دې مخکې افغانستان ته له د غو چورلکو ۳۲ ورکړې او د هوکړې له مخې، ټاکل شوې وه په راتلونکو کلونو کې د نورو چورلکو او الوتکو ترڅنګ ډيرې نورې مي۱۷ هم افغان هوایي ځواک ته ورکړي.
خو د تېر اګسټ له پنځلسمې وروسته، کله چې په افغانستان کې تېر حکومت سقوط وکړ، ورسره د امریکا او افغانستان ترمنځ د پوځي همکاریو تړونونه وځنډېدل، دغه هېواد په افغانستان کې له اوسني حکومت سره پوځي مرستې هم بندې کړې.
د شمېرو له مخې، افغانستان د جمهوریت پر مهال د افغان هوایي ځواک ټولې نږدې ۱۶۷ پوځي الوتکې او چورلکې درلودې چې ډيرې یې په وروستیو کلونو کې له امریکا ترلاسه کړې وې.
خو په افغانستان کې د اوسني سرپرست حکومت له واکمنېدو وروسته، ډېر زیان د افغان پوځ هوایې ځواک ته واوښت؛ ډېرې چورلکې او الوتکې خپله د بهرنیو ځواکونو له خوا ویجاړې شوې او یو شمېر نورې هم شمالي ګاونډيو هېوادونو لکه تاجکستان او اوزبکستان ته واړول شوې.
د افغانستان سرپرست حکومت وایي چې دا مهال په تاجکستان او اوزبکستان کې د افغانستان نږدې ۴۰ چورلکې او الوتکې ولاړې دي او باید بېرته افغانستان ته ور وسپارل شي.
غړيYou need to subscribe to view the full article. Please login or register a new account.
