<p style="text-align: justify;">مزارشریف (پژواک، ۵ غویی ۱۴۰۱): د بلخ یو شمېر معلولینو د دغه ولایت له ديني عالمانو غوښتي چې له معلولینو سره د چلند په اړه کې دې د منبر له لارې خلکو ته پوهاوى ورکړي.</p>
<p style="text-align: justify;">يادو معلولینو نن د بلخ په مرکز مزارشریف ښار کې د دغه ولایت له ديني عالمانو سره ګډه غونډه جوړه کړه او خپلې ستونزې يې ورسره شريکې کړې.</p>
<p style="text-align: justify;">دغه معلولين وايي: ((معيوب هغه چا ته ويل کېږي چې عيب ولري، يعنې غل وي، قاتل وي او يا هم پر فساد تورن وي.))</p>
<p style="text-align: justify;">د بلخ معلولینو لپاره د حق غوښتنې شبکې ویاند سید محمد یزدان پرست وایي چې معلولیت يوه تحمیل شوې ټولنیزه پدیده ده چې لاملونه یې جګړه، فقر، د فلج واکسین نه رسېدل او جنټیکي موضوعات دي.</p>
<p style="text-align: justify;">هغه دغه راز وایي چې معلولینو ته دې معیوب نه ویل کېږي؛ ځکه معیوب هغه چا ته ویل کېږي منفي کارونه يې کړي وي.</p>
<p style="text-align: justify;">یزدان پرست د بلخ د حج او اوقافو له ریاست او د دغه ولایت له عالمانو وغوښتل چې د منبر له لارې دې خلک له معلولينو سره پر سم چلند وپوهوي.</p>
<p style="text-align: justify;">دغه راز د بلخ د معلولینو ځانګړي ښوونځي د دوولسم ټولګي زدهکوونکي باسط مولوي زاده پژواک ته وويل چې ښوونځي ته د تګ پر مهال له ستونزو سره مخ دی او د تګ لپاره ټرانسپورت نه لري.</p>
<p style="text-align: justify;">نوموړی له علماوو غواړي چې د جمعې لمانځه پر مهال دې خلکو ته د دوی د ستونزو په اړه خبرې وکړي او خلک دې پر دغو ستونزو خبر کړي.</p>
<p style="text-align: justify;">همدارنګه يو بل معلول محمد اکرم وايي چې معلولین د ټولنې له زیانمنونکو خلکو دي او په ژوند کې له ګڼو ستونزو مخ دي.</p>
<p style="text-align: justify;">هغه وایي چې معلولین د نورو انسانانو په څېر د کار کولو توان نه لري او تل له اقتصادي ستونزو سره مخ وي.</p>
<p style="text-align: justify;">بلخوا د بلخ د حج او اوقافو ریاست د ارشاداتو امر نعمت الله ابو طارق هم په ټولنه کې د معلولینو حقونو او په دې برخه کې د اطلاعاتو رسونې په برخه کې د دیني عالمانو رول مهم او ارزښتناک بولي.</p>
<p style="text-align: justify;">هغه وایي چې د معلولینو د ارزښت، مقام او درناوي په اړه به د بلخ ټولو علماوو ته خبر ورکړي څو په میاشت کې یو ځل د جمعې لمانځه پر مهال په دې اړه د اسلام له نظره بحث، خبرې او خلکو ته پوهاوی ورکړي.</p>
