د کاپیسا خلک په بازار کې د تاریخ تېر خوراکي توکو له پلوره شکایت کوي

محمودراقي (پژواک، ۱۸ غویی ۱۴۰۱): د کاپیسا یو شمېر اوسېدونکي وایي چې د بازار نه کنترولېدو له امله دوکانداران پر خلکو تاریخ تېر خوراکي توکي پلوري.

د کوهستان د لومړۍ حصې یوه اوسېدونکي عبدالله پژواک ته وویل چې هټۍ وال له څو کلونو پاتې خوراکي توکي پر خلکو پلوري.

هغه تاریخ تېر خوراکي توکي د انسان د روغتیا لپاره مضر وبلل او ویې ویل چې له دغو توکو استفاده د بېلابېلو ناروغیو لامل کېږي.

هغه زیاته کړه: «یوه ورځ مې د خپل ماشوم لپاره کور ته له نږدې دوکانه وچې شیدې واخیستې، کله مو چې ترې استفاده وکړه، پوه شوو چې ترخې دي.»

نوموړي د دې په ویلو سره چې دوکانداران له څو کلونو راهیسې د دوکان پر ځای له کانټینرونو کار اخلي، وویل، که د توکو نېټه سمه هم وي خو د هوا په ګرمېدو سره خوراکي توکي او مشروبات خرابېږي.

د دغه ولايت يو بل اوسېدونکی عنايت الله هم د بې کيفيته خوراکي توکو له پلور څخه د شکايت ترڅنګ  د سالم مديريت او د بازار نه کنټرولېدو په اړه اندېښمن دی.

هغه له اړوند مسوولینو وغوښتل، څو له وخته تېر او خراب شوي خوراکي توکي له بازاره ټول کړي او له سرغړوونکو سره قانوني چلند وکړي.

په همدې حال کې د کاپیسا ښاروالي مسوولین شته ستونزې مني او ژمنه کوي چې دېر ژر به دې ستونزې ته رسېدنه وکړي.

د کاپیسا ښاروال مولوي عبیدالله حسام پژواک ته وویل چې هټۍوالو ته یې څو ځلې خبر ورکړی څو بې کیفیته او تاریخ تېر خوراکي توکي او مشروبات ونه پلوري.

نوموړي زیاته کړه: «هټۍوال ځان ته ګټه کوي خو موږ ته د هېوادوال روغتیا اړینه ده او مخنیوی یې کوو.»

نوموړی زیاتوي، د تاریخ تېر او بې کیفیته توکو پېژندنې او راټولونې لپاره له مخکې کمېټه شتون لري، خو دوی بیا هم هڅه کوي څو یوه خپلواکه کمېټه د بازار د کنترول، تاریخ تېر او بې کیفیته خوراکي توکو راټولولو لپاره جوړه کړي.

د کاپیسا ښاروال خبرداری ورکړ، که سپارښتنه یې له پامه وغورځول شي نو له جدي او قانوني چلند سره به مخ شي.