خوست کې لسګونه کيلوګرامه نشه يي توکي کشف او ترلاسه شوي

خوست‌ښار (پژواک، ۲۱ غويی ۱۴۰۱): د خوست امنيه قومانداني په دغه ولايت کې د لسګونه کيلوګرامه نشه يي توکو ترلاسه کولو او ورسره په تړاو د اتو کسانو نیولو خبر ورکوي.

سرچینه دغه راز زیاتوي چې په دې وروستيو کې يې د نشه يي توکو د قاچاقبرانو، انسان‌تښتوونکو او د وسله والو غلو پر وړاندې جدي مبارزه پيل کړې او په دې برخه کې ډېرې لاسته راوړنې لري.

د خوست امنيې قوماندانۍ د نشه يي توکو پر ضد د مبارزې مدير مولوي ميرصادق خان پژواک خبري اژانس ته وويل چې په تېرو درېيو اونيو کې یې ۱۲۳ کيلوګرامه چرس، ۴۰۰ ګرامه شيشه او يو اندازه نور نشه يي توکي ترلاسه کړي دي.

د نوموړي په خبره چې یاد توکي د دغه ولايت په مرکز او ولسواليو کې د ځانګړو عملياتو پر مهال امنيتي ځواکونو کشف او ترلاسه کړي او ورسره په تړاو يې اته کسان هم نيولي دي.

هغه وايي چې د نیول شوو کسانو دوسيې يې عدلي او قضايي ارګانونو ته سپارلې دي.

میرصادق خان زياته کړه، د نشه يي توکو پر ضد د مبارزې مديريت ژمن دی چې قاچاقبران ونيسي او د قانون منګولو ته يې وسپاري او هیچا ته به اجازه ورنه کړي چې د دوی تنکي ځوانان بې‌لارې او پر نشه‌يي توکو اخته کړي.

بل لور ته د خوست امنيي قوماندانۍ مطبوعاتي مسوول مستغفر ګربز پژواک اژانس ته وويل چې په دغه ولایت کې د امنيت ټينګښت په برخه کې یې د ځواکونو هڅې ګړندۍ شوې او هر وخت د انسان تښتوونکو، وسله والو غلو او نشه يي توکو د قاچاقبرانو په لټه دي.

نوموړي زیاته کړه چې تېره ورځ هم امنيتي ځواکونو يو ماشوم د انسان‌تښتوونکو له منګولو وژغوره او خپلې کورنۍ ته يې وسپاره.

ګربز د خپلو خبرو په دوام وویل، هیچا ته به اجازه ورنه کړي چې د خوست‌مېشتو امنيت له ګواښ سره مخ کړي او په دې برخه کې خلک هم بايد جدي همکاري وکړي.