لوګر (پژواک، ۳ غبرګولی ۱۴۰۱): د لوګر ولایت د محمداغې ولسوالۍ په مغل خېلو کلي کې د ډبرو او کرومایټو په یوه کان کې د چاودنې له امله یو کس وژل شوی او دوه نور ټپيان شوي دي.
چارواکي وايي، پېښه تېره شپه شاوخوا دولس بجې د باروتو د چاودنې له امله شوې ده.
د لوګر د امنیې قوماندانۍ ویاند احمدالله انس پژواک خبري اژانس ته وویل، د محمد اغې ولسوالۍ اړوند د مغل خېلو سیمې د ډبرو او کرومایټو په کان کې هغه مهال درېیو کارګرو ته مرګ ژوبله اوښتې چې د کان کیندلو په موخه باروتو ته چاودنه ورکول شوه.
هغه زیاته کړه، په دې پېښه کې یو کس وژل شوی او دوه نور ټپیان شوي چې درې واړه د کندهار ولایت اوسېدونکي دي.
دی وايي، ټپيان د خپلو ملګرو له خوا روغتون ته لېږدول شوي چې د یوه روغتیايي وضعیت د اندېښنې وړ دی.
انس یادونه وکړه چې د پېښې په اړه څېړنې پیل شوې او ښکاري چې د بې احتیاطۍ له امله رامنځ ته شوې ده.
د یادونې ده، له دې مخکې هم د هېواد د ځینو ولایتونو په کانونو کې د احتیاطي تدابیرو نه مراعاتولو له امله ورته پېښې شوې او کارګرو ته یې مرګ ژوبله اړولې ده.
غړيYou need to subscribe to view the full article. Please login or register a new account.
