ننګرهار کې د ترکيې په مرسته د نجونو د يوه ښوونځي ودانۍ بياورغول شوه

جلال اباد (پژواک، ۷ غبرګولی ۱۴۰۱): د ننګرهار د پوهنې رياست چارواکي وايي، جلال اباد ښار کې د ترکيې په مرسته د نجونو د يوه ښوونځي ودانۍ بياورغول شوه.

د پوهنې رياست د معلوماتو له مخې، په جلال اباد ښار کې «د نازو انا» لېسې د ودانۍ پرانيستنه نن د غبرګولي پر ۷مه د ترکيې د سفير له لوري وشوه.

د پوهنې رياست له مطبوعاتي دفتر څخه پژواک ته په را استول شوې خبرپاڼه کې راغلي، د ترکيې سفير جهاد ارګينای ننګرهار ته د سفر پرمهال په جلال اباد ښار کې د ترکيې په مرسته د نازو انا د نجونو لېسې ودانۍ تر بيارغونې وروسته، ګټې اخيستنې ته وسپارله.

سرچينه زياتوي، د نازوانا لېسې دغه ودانۍ چې دولس درسي خونې او يو کتابتون لري، په عصري ډول ترميم شوي دي.

سرچينې د ترکيې د سفير جهاد ارګينای له قوله ويلي چې هېواد يې له افغانستان سره بشري مرستو ته ژمن دی او د دغه ښوونځي بيارغونه يې له افغان ولس سره د ترکيې د خلکو د مينې او ورورګلوۍ پايله ياده کړه.

خبرپاڼه کاږي، د ننګرهار د پوهنې رييس مفتي حبيب حضرت حقاني، د ترکيې له سفير مننه وکړه چې د افغان ماشومانو د ښوونې او روزنې بهير د پياوړتيا په برخه کې مرسته کوي.

د ننګرهار د پوهنې رياست چارواکي، که څه هم د دغه ښوونځي د بیارغونې دقيق لګښت نه په ګوته کوي خو وايي، د ودانۍ ټول لګښت د ترکيې له لوري ورکړل شوی او د ودانۍ د بيارغونې چارې د ترکيې د ټيکا په نوم يوې موسسې له لوري ترسره شوې دي.