[restrict paid="true"]
کندهار (پژواک، ۲۰ غبرګولی ۱۴۰۱): چاراوکي وایي، د کندهار په سپين بولدک ولسوالۍ کې د امنیتي کسانو پر موټر د یوه زاړه ماین چاودنې له امله شپږو کسانو ژوند له لاسه ورکړی او یو کس ټپي شوی دی.
د سپين بولدک امنیه قوماندان محمدهاشم محمود پژواک خبري اژانس ته وویل چې دغه چاودنه تېره ورځ (پنجشنبه) سهار شاوخوا اته بجې د یادې ولسوالۍ په «سرو څاهان» سیمه کې شوې ده.
هغه وايي: «مجاهدینو ګزمه کوله او له یوه کوچي سره یې د هغه ورک شوي پسونه پیدا کول چې [موټر یې] پر یوه پخواني ماین ختلی، لومړی څلور مجاهدین او یو عام کس شهیدان شوي او دوه مجاهدین ټپيان شوي وو خو وروسته یوه بل مجاهد هم په روغتون کې ساه ورکړه.»
امنیه قوماندان زیاته کړه چې دغه ماین له پخوا په سیمه کې پاتې و.
له دې مخکې هم د کندهار په بېلابېلو سیمو کې ناچاوده توکي پر ماشومانو او نورو کسانو چاودلي او مرګژوبله یې اړولې ده.
خلک له حکومتي چارواکو غواړي چې د ناچاوده توکو په اړه منظمې پلټنې وکړي او د ماینونو پاکولو ډلې هغه سیمي پاکې کړي چې د ناچاوده توکو د شتون ګواښ په کې شته.
[/restrict]
