پکتيکا کې هغه غله نیول شوي چې ۹،۳ میلیونه کلدارې يې غلا کړې وې

<p style="text-align: justify;">ښرنه (پژواک ۲۲ غبرګولی ۱۴۰۱): د پکتيکا امنيتي مسوولين وایي، څلور تنه هغه غله یې نيولي چې تېره ورځ یې په سروضه ولسوالۍ کې له يوه سوداګر څخه څه باندې نهه میلیون کلدارې غلا کړې وې.</p>

<p style="text-align: justify;">د دې ولايت د امنیت آمر جاوېد بدري وایي، نيول شويو غلو تېره ورځ د سروضې ولسوالۍ په پړاو سيمه کې له یو تن سوداګر څخه نهه میلیونه او درې سوه زره پاکستانۍ کلدارې غلا کړې وې.</p>

<p style="text-align: justify;">د ده په خبره، دغه غلا یې له سوداګر څخه په داسې مهال کړې چې نوموړی د سړک غاړې ته د لمانځه لپاره درېدلی و او وروسته ترې يادو څلورو تنو د موټر ښیښې ماتې کړې او پیسې یې ترې وړې وې.</p>

<p style="text-align: justify;">هغه زياته کړه، دغو غلو غوښتل چې غلا کړې پیسې خوست ولایت ته انتقال کړي، خو د زېړوک ولسوالۍ په سرميدان سيمه کې امنیتي ځواکونو نيولي دي.</p>

<p style="text-align: justify;">بدري وايي، نيول شويو کسانو په خپل جرم اعتراف کړی دی.</p>

<p style="text-align: justify;">د ده په وينا، له کره پلټنو وروسته به له سوداګر څخه غلا شوې پیسې هم بېرته اصلي مالک ته وسپارل شي.</p>