[restrict paid="true"]
کابل (پژواک، ۳ چنګاښ ۱۴۰۱): د بهرنیو چارو وزارت وايي، د افغانستان او بېلابېلو هېوادونو علماوو له اسلامي نړۍ غواړي چې په افغانستان کې له راغلي اسلامي نظام څخه ملاتړ وکړي او خپلې همکارۍ او اړېکې ورسره لا ژورې کړي.
دغه خبره د بهرنیو چارو وزارت له خوا رسنيو ته په استول شوې خبرپاڼه کې بيان شوې ده.
سرچينې لیکلي ده: «مولوي امیرخان متقي او افغاني شیوخو کرامو تېره شپه د "مجمع الفقه الاسلامیه نړیوالې ټولنې" له مشر، ورسره د بېلابېلو هیوادو علماوو، د اسلامي همکاریو د سازمان له مرستیال او په کابل کې سفیر او استازو سره ناسته کړې ده.»
د خبرپاڼې له مخې، په دغه غونډه کې د بهرنيو چارو وزارت سرپرست مولوي امیرخان متقي وویل چې علماء پر اسلامي امت باندې د الله تعالی رحمت دی او په افغانستان کې د «اشغال ضد جهاد او د نوي اسلامي نظام حاکمیت» د علماوو تر قیادت لاندې راغلی او رهبري کېږي.
سرچیني زیاته کړې چې غونډه کې د «مجمع الفقه الاسلامیه نړیوالې ټولنې» مشر او استازو په پکتیکا کې د وړمې شپې زلزلې قربانیانو ته دعا وکړه او د نظام د استحکام او پرمختګ په اړه یې خپلي مشورې شریکي کړې .
په خبرپاڼه کې راغلي: «د هیواد شیخو کرامو هم په خپل وار سره خبرې وکړې او ټولو په یوه خوله په ټوله اسلامي نړۍ ږغ وکړ چې په افغانستان کې له راغلي اسلامي نظام څخه کامل ملاتړ وکړي او خپلې همکارۍ او اړېکې لا ژورې کړي.»
د سرچینې په وینا، د افغانستان علماو له یاد پلاوي غوښتنه وکړه چې د افغانستان عیني واقعیت او ریښتونی انځور تر نړیوالو ورسوي.
[/restrict]
