<p style="text-align: justify;">کابل (پژواک ۶ چنګاښ ۱۴۰۱): د ریاستالوزرا مرستیال د «بلخاب» له مشرانو سره په لیدنه کې ویلي، حکومت نه غواړي ملکي خلکو ته زیان واوړي او هیچا ته به اجازه ورنه کړي چې د ملت منځ کې «فتنې» راپورته کړي.</p>
<p style="text-align: justify;">د تېرې جمعې په ورځ (د چنګاښ ۳مه) ځیني <strong><a href="https://8am.af/the-fierce-fighting-between-the-taliban-and-maulvi-mahdis-forces-in-balkhab-continues/">راپورونه</a> </strong>خپاره شول چې د سرپل په بلخاب ولسوالۍ کې د امنیتي ځواکونو او د یو ځایي هزاره توکمه قوماندان مولوي مهدي د پلویانو ترمنځ جګړه شوې ده.</p>
<p style="text-align: justify;">د <strong><a href="https://www.bbc.com/pashto/afghanistan-61938445?at_custom4=AC0785EC-F492-11EC-BDE9-7E09933C408C&at_custom1=%5Bpost+type%5D&at_custom2=facebook_page&at_campaign=64&at_custom3=BBC+Pashto&at_medium=custom7&fbclid=IwAR0cbngqv6FkxrVDAnVVFY2513zgRgOVw-w7jDe5Om1P6t4WsSWmKsGfcXE">راپورونو</a> </strong>له مخې، مهدي د امنیتي ځواکونو په لیکو کې یوازېنی هزاره توکمه قوماندان و خو له څه مودې راهیسې ترې جلا شوی دی.</p>
<p style="text-align: justify;">د ملي دفاع وزارت د شنبې په ورځ د یوې اعلامیې په خپرولو سره ویلي وو: «څو ورځې وړاندې د هېواد دفاعي او امنيتي ځواکونو د سرپل په بلخاب ولسوالۍ کې د بغاوتګرو پر وړاندې ګډ چاڼيز عمليات ترسره کړل؛ دغو ځواکونو نن سهار د هغو سيمو په نيولو سره چې باغيان په کې وو، عملیات پای ته ورسول.»</p>
<p style="text-align: justify;">سرچينې لیکلي وو چې دغه عمليات لا هم د يادې ولسوالۍ د لرو پرتو سيمو پاکولو په موخه له کوم خنډ پرته پر مخ روان دي.</p>
<p style="text-align: justify;">د ریاستالوزرا مطبوعاتي دفتر په خبرپاڼه کې راغلي چې د ریاستالوزرا اداري مرستیال مولوي عبدالسلام حنفي تېره ورځ د افغانستان د اهل تشیع له یو شمېر علماوو او مشرانو سره وکتل.</p>
<p style="text-align: justify;">سرچینې لیکلي چې په لیدنه کې شریفي بلخابي د اهل تشیع ګډونوالو په استازیتوب خبرې وکړې؛ ویې ویل چې د بلخاب خلک سوله خوښوي، هېوادپال دي او د هيڅ ډول ستونزو غوښتونکي نه دي.</p>
<p style="text-align: justify;">هغه د جزئیاتو له ورکولو پرته ویلي: «د دې ستونزو اصلي عاملین هغه کسان دي چې له دې مسایلو ناوړه استفاده کوي.»</p>
<p style="text-align: justify;">د ریاستالوزرا مرستیال مولوي عبدالسلام حنفي ویلي: «اسلامي امارت هیڅکله نه غواړي ملکي خلکو ته زیان واوړي، بلکې د اسلامي امارت نظام پالیسي دا ده چې د هيڅ هېوادوال پر وړاندې دریځ ونه نیسي.»</p>
<p style="text-align: justify;">ده ویلي چې اسلامي امارت له ټولو افغانانو سره په ورورولۍ کې د ژوند تېرولو غوښتونکی دی او هیچا ته به اجازه ورنه کړي چې د ملت ترمنځ «فتنې» راپورته کړي.</p>
