بایډن: الظواهري مو وواژه، د القاعده ضد عملیاتو ته په افغانستان او نورو سیمو کې دوام ورکوو

[restrict paid=”true”]

لومړی تعقیب – اټلانټا (پژواک، ۱۰ زمری ۱۴۰۱): د امریکا ولسمشر جو بایډن رسماً اعلان وکړ چې د افغانستان په پلازمېنه کابل کې د امریکا د بې‌پیلوټه هوایي برید کې د القاعده مشر ایمن الظواهري وژل شوی دی.

دغه برید وړمه ورځ سهار شپږنیمې بجې د کابل ښار لسمې حوزې اړوند د شېرپور په سیمه کې هغه مهال وشو چې یوې امریکایي بې‌پیلوټه الوتکې د استوګنې یو کور په نښه کړ.

پرون د افغانستان د کورنیو چارو وزارت ویلي چې په سیمه کې یو توغندی لګيدلی، خو زیان نه لري.

امریکایي رسنیو نن د زمري ۱۰مه د باوري سرچینو په حواله خبر ورکړ چې د کابل په هوایي برید کې د القاعده مشر ایمن الظواهري وژل شوی.

خو له دغه خبر دوه ساعته وروسته د امریکا ولسمشر جو بایډن له سپینې ماڼۍ په ژوندۍ بڼه خپل ولس ته د کابل په برید کې د ایمن الظواهري د وژل کيدو پخلی وکړ.

Happening Now: President Biden addresses the nation on a successful counterterrorism operation. https://t.co/JiYnzn5TUj

— The White House (@WhiteHouse) August 1, 2022

هغه وویل: «د شنبې په ورځ زما په امر ستاسو ځواکونو په کابل کې د القاعده مشر ایمن الظواهري وواژه، هغه د اسامه ملګری و، مرستیال یې و، د سپټمبر یوولسمې بریدونو کې دخیل و، چېرې چې نږدې ۳۰۰۰ امریکایان ووژل شول.»

بایډن زیاته کړه چې دغه راز الظواهري له کلونو راهیسې په بېلابېلو سیمو کې پر امریکایي وګړو بریدونو کې ښکېل و؛ په کینیا او تنزانیا کې د امریکا پر سفارت برید کې ښکېل و، چېرې چې لسګونه کسان ووژل شول.

د نوموړي په وینا، الظواهري امریکایي وګړي، ډیپلوماتان، سرتېري وژلي او د امریکا د ګټو خلاف یې کړنې ترسره کړې، ویډیوګانې یې خپرولې او خلک یې د امریکا ضد کړنو ته هڅول.

د امریکا ولسمشر وایي: «ایمن الظواهري په ټوله نړۍ کې د القاعده د فعالیتونو رهبري کوله، اوس عدالت تامین شو، ووژل شو، خلک دې نور له هغه وېره نه لري.»

د هغه په وینا، امریکا به له دغو خلکو د خپلو وګړو دفاع کوي.

جو بایډن د ترسره شوو عملیاتو په اړه وویل چې دوی د کابل ښار په مرکزي ساحه کې د الظواهري ساحه دقیقه کړه، بیا یې د عملیاتو امر وکړ، تېره اونۍ یې وروستی پلان جوړ او د شنبې په ورځ یې عملي کړ.

نوموړي زیاته کړه چې په دغو عملیاتو کې د القاعده د مشر د کورنۍ بل غړي یا ملکي وګړو ته زیان نه دی اوښتی.

هغه وایي: «زما ادارې تېر کال په افغانستان کې نظامي ماموریت پای ته ورساوه، هلته نور زموږ سرتېرو ته اړتیا نشته، خو موږ به افغانستان او نورو سیمو کې د ترهګرۍ ضد عملیاتو ته دوام ورکوو.»

د امریکا ولسمشر وایي، که یې وګړو ته  هر چېرې ګواښ پېښ شي، دوی به ترهګرو پسې ځي او له منځه به یې وړي.

ده زیاته کړه، تېره فبرورۍ میاشت کې یې سوریه کې بریالي عملیات وکړل او هلته یې د داعش او القاعدې مشران له منځه یووړل.

ده زیاته کړه: «د سر اعلی قوماندان په توګه زما مسوولیت دی چې امریکایان خوندي وساتو، امریکا د ترهګرۍ ضد جګړه نه ده پیل کړې، هغوی پر موږ لومړی برید کړی، موږ د اصولو له مخې سم ځواب ورکړی دی، بې ګناه خلک مو وژغورل او خلکو ته مو ازادي ورکړه.»

د یادونې ده، د القاعده پخوانی مشر اسامه بن‌لادن ۱۱ کاله مخکې د پاکستان په ایبټ‌اباد ښار کې د امریکا د ځانګړو عملیاتو په پایله کې وژل شوی و.

د افغانستان اسلامي امارت ویاند ذبیح لله مجاهد تېره شپه ناوخته په یو لړ ټویټونو کې ویلي چې ‏ وړمه ورځ د کابل ښار شېرپور سیمې د استوګنې پر یوه کور هوایي برید ترسره شوی.

‏هغه زیاته کړې، په لومړیو کې د پېښې نوعیت څرګند نه شو. د اسلامي امارت امنیتي او استخباراتي ارګانونو د پېښې پلټنه وکړه او په لومړنیو پلټنو يې دا ومونده چې یاد برید د امریکايي ډرون الوتکو له لوري شوی.

په کابل ښار د ډرون برید په اړه د اسلامي امارت د ویاند څرګندوني

د روان ۱۴۴۴ هجري قمري کال د لومړۍ میاشتې په دوهمه نېټه د کابل ښار په شېرپور سیمه کې په یوه مسکوني کور هوایي برید ترسره شو.
په لومړیو کې د پېښې نوعیت څرګند نشو.

— Zabihullah (..ذبـــــیح الله م ) (@Zabehulah_M33) August 1, 2022

مجاهد ویلي، ‏دا برید که په هره پلمه شوی وي، د افغانستان اسلامي امارت یې پر کلکو ټکو غندي او د نړۍوالو اصولو او د دوحې تړون ښکاره سرغړونه یې بولي.

د نوموړي په وینا، دا ډول کړنې د تېرو شلو کلونو د ناکامو تجربو تکرار او د امریکا د متحده ایالتونو، افغانستان او سیمې د ګټو خلاف عمل دی.

‏ده زیاته کړې، د داسې کړنو تکرار به شته فرصتونو ته زیان واړوي.

خو مجاهد دا نه دي ویلي چې په برید کې څوک او یا د چا کور هدف ګرځول شوی او مرګ ژوبله یې لرله که نه.

[/restrict]