ګردېز (پژواک، ١٣ زمرى ١٤٠١): د پکتيا د کرنې رياست وايي چې په دې وروستيو کې پر پوست د دانو له امله ٩٥٠ کورنۍ غواګانې مړې شوې دي.
د پکتيا د کرنې رييس مولوي عبدالرووف سعيد پژواک ته وويل چې په دې وروستيو کې په دغه ولايت کې غواګانو ته يو ډول د پوستکې ناروغي پيدا شوې چې دانې پرې راخيژي.
هغه وايي چې د همدې دانو له امله تر اوسه په دغه ولايت کې ٩٥٠ غواګانې مړې شوې دي.
نوموړی زياتوي چې د دې ناروغي د مخنيوي په موخه يې ټولو ولسواليو ته وترنران لېږلي څو غواګانو ته واکسين او نور درمل ورکړي.
خو سعيد زياتوي چې کومې غواګانې چې پر يادې ناروغۍ اخته هم وي غوښه يې د خوراک وړ ده خو د احتياط لپاره بايد ترې ډډه وشي.
بل لور ته خلک هم په غواګانو کې د دې ډول ناروغۍ له پيدا کېدو شکايت کوي.
د زرمت ولسوالۍ يوه اوسېدونکي نېکمحمد پژواک ته وويل: «شاوخوا يوه مياشت کېږي چې زموږ په سيمه کې د غواګانو پر پوستکي دانې راخيژي چې ډېرې غواګانې يې تر اوسه مړې کړې دي.»
د هغه په وينا، د سيمې خلکو تر اوسه د يادې ناروغۍ د له منځه وړو په موخه له ډول ډول درملو کار اخيستى خو کومه مثبته نتيجه يې نه ده ترلاسه کړې.
دا په داسې حال کې ده چې څو ورځې وړاندې د ګردېز ښاروالۍ له لوري په ښار کې د روغو او ناروغو غواګانو پر حلالولو او د غوښې پر پلورلو بنديز لګول شوى دى.
