نورستان کې له ۵۰۰ بېځایه شوو کورنیو سره مرسته وشوه

پارون (پژواک ۱۷ زمرى ۱۴۰۱): د ملګرو ملتونو د کډوالو چارو ادارې په نورستان کې له ۵۰۰ بېځایه شوو کورنیو سره د غیرخوراکي توکو مرسته وکړه.

د ملګرو ملتونو د کډوالو چارو د دفتر (UNHCR) مشر ویلیم نن (د زمري ۱۷مه) نورستان ولایت ته راغلی او دغلته یي له والي حافظ محمداغا حکیم او د بېځایه شوو کورنیو له استازو سره ولیدل او د هغوى ستونزې يې واورېدې  .

ویلیم وویل چې د دوى ادارې دا مهال په دغه ولايت کې د پنځه سوه کورنيو  لپاره د غيرخوراکي توکو بستې راوړې او نن يې د وېش لړۍ هم عملاً پيل کړه.

هغه زیاته کړه چې دوى په ياد ولايت کې له څلور زره نورو کورنيو سره د مرستو په موخه سروې پيل کړې ده او د ژمي له رارسېدو مخکې به یې ووېشي.

بلخوا د نورستان والي او نورو مسوولينو د خپلو ادارو اړوند ستونزې بيان کړې او د ملګرو ملتونو د کډوالو چارو د دفتر له مشر يې وغوښتل چې د پوهنې، سړکونو جوړولو او روغتيا په برخو کې هم مرستې وکړي.

دغه راز د کامدېش یوه اوسېدونکي مولوي سليمان چې دا مهال په مرکز پارون کې د کډوالو استازولي کوي، وويل چې د دغه ولايت ډېر داخلي بېځايه شوي غواړي بېرته خپلو مېنو ته ستانه شي خو ډېری يې د بېرته تللو مالي توان نه لري او د ځينو کورونه هم ويجاړ شوي دي.

هغه له يادې ادارې غوښتنه وکړه چې د هغو خلکو لاسنيوى وکړي چې غواړي بېرته خپلو کورونو ته ستانه شي.

غړي

You need to subscribe to view the full article. Please login or register a new account.