[restrict paid="true"]
اټلانټا (پژواک، ۲۵ زمری ۱۴۰۱): اروپایي اتحادیې یو ځل بیا په ټینګار سره ویلي، څو چې د افغانستان سرپرست حکومت بشري حقونو ته د درناوي ژمنتیا ونه ښيي، په رسمیت به ونه پېژندل شي.
د افغانستان لپاره د اروپایي اتحادیې ځانګړي استازي نیکولاس توماس دا څرګندونې د ملګرو ملتونو د بشري حقونو څانګې وروستیو څرګندونو ته په اشاره کړې دي.
د ملګرو ملتونو د بشري حقونو څانګې د افغانستان د جمهوري حکومت د سقوط د یوه کال بشپړېدو په مناسبت په یوه اعلامیه کې ویلي وو: «د نړۍ په بل هیڅ ځای کې د ښځو او نجونو پر حقونو دومره پراخ، سیستماتیک او هر اړخیز برید نه دی شوی، څومره چې په افغانستان کې شوی.»
https://twitter.com/tomas_niklasson/status/1559639396592271361?s=20&t=ZxNGt5LOKsSljIsj-jVpCA
د اروپایي اتحاديې ځانګړي استازي زیاته کړې، څو چې د افغانستان سرپرست حکومت د بشري حقونو ته د درناوي په برخه کې د پام وړ ګامونه پورته نه کړي، د نجونو د منځنیو ښوونځیو سمدستي پرانيستلو او باکیفیته زدهکړو ته د هغوی د لاسرسي لپاره اقدامات ونه کړي، نو د دوی د رسمیت پېژندلو په برخه کې به اقدامات نه کيږي.
دا په داسې حال کې ده چې د پوهنې وزارت ویاند عزیزاحمد ریان نن (د زمري ۲۵مه) په کابل کې «ملت ته د حکومت د حساب ورکونې» په ناسته کې د نجونو ښوونځیو له شپږم پورته ټولګیو د بېرته پیلېدو په اړه د خبریالانو د پوښتنې په ځواب کې وویل، د نجونو له شپږم پورته ټولګيو د پرانیستلو پر طرحې اوس هم کار روان دی.
دى وايي، څو چې دغه طرحه بشپړه شوې نه وي، د نجونو ښوونځي به همداسې تړلي وي.
دغه راز د سرپرست حکومت ویاندویانو تل ویلي چې په افغانستان کې بشري حقونه یې د اسلام په چوکاټ کې ورکړي دي.
[/restrict]
