<p style="text-align: justify;">مزارشریف (پژواک، د وږي لومړۍ نېټه ١٤٠١): د بلخ ولايت دولتاباد ولسوالۍ په دوو کليو کې په تېرو دوو اونيو کې ١٦ کورونه سوځېدلي دي.</p>
<p style="text-align: justify;">د بلخ دولتاباد ولسوالۍ د قرچيګک او تليګک کلیو اوسېدونکي د اورلګېدنې دغه پېښې طبیعي ګڼي او وایي چې د کور ټول توکي یې سوځېدلي دي.</p>
<p style="text-align: justify;">د تليگک کلي یوه اوسېدونکي ايرګش چې کور يې سوځېدلى، پژواک ته وويل، د تېرې جمعې شپه کله چې له کوره بهر و، د کور يوه برخه یې وسوځېده او وروسته يې بيا نورې برخې هم وسوځېدې.</p>
<p style="text-align: justify;">نوموړی زیاتوي چې د پېښې څرنګوالی او د اورلګېدنې لامل ورته معلوم نه دی خو د کور دننه اتاقونه یې کله چې څوک نه وي، په طبیعي توګه اور اخلي.</p>
<p style="text-align: justify;">ایرګش دغه راز وایي چې د کور ډېری توکي یې د اورلګېدنې له امله سوځېدلي او هيڅ هم ورپاتې نه دي، هغه له حکومت او مرستندویه ټولنو وغوښتل څو لاسنیوی يې وکړي.</p>
<p style="text-align: justify;">د دې سیمې بل اوسېدونکی نعمتالله وایي چې په یوه ورځ د تليګک سیمې شپږ کورونه هممهاله سوځيدلي او لامل یې هم معلوم نه دی.</p>
<p style="text-align: justify;">خو وایي چې د کورونو سوځېدو پر مهال په خونو کې څوک نه وو.</p>
<p style="text-align: justify;">هغع وایي: «په جوماتونو کې مو خیراتونه وو، د کلي خلک خیرات ته تللي وو چې شاوخوا یوولس بجې خبر شوو چې ځیني کورونو اور اخیستی، کله چې راغلو اورلګېدنه روانه وه.»</p>
<p style="text-align: justify;">نعمتالله وایي چې زیانمنې کورنۍ ډېرې بېوزلې دي او د کور شته توکي او امکانات یې له لاسه ورکړي.</p>
<p style="text-align: justify;">د دې سیمې قومي مشر عبدالحق هم د پېښې له څرنګوالي ناخبري ښیي خو وایي چې تر دې دمه په دغو کلیو کې په طبیعي ډول ۱۶ کورونه سوځېدلي دي.</p>
<p style="text-align: justify;">هغه زیاتوي چې په یاده سیمه کې شاوخوا ۱۳۰۰ کورنۍ ژوند کوي او ډېرې یې دې پېښې وېرولي، خو تر دې دمه څوک د کورونو پرېښودو ته اړ شوي نه دي.</p>
<p style="text-align: justify;">په همدې حال د بلخ د دولتاباد ولسوالۍ امنیه قوماندان خیرمحمد روحاني هم یاده پېښه طبیعي ګڼي او وایي چې له تېرو دوو اونیو راهیسې تر اوسه ۱۶ کورونه په طبیعي توګه سوځيدلي دي.</p>
<p style="text-align: justify;">روحاني زیاتوي چې دې سیمې ته تېره ورځ یو شمېر سیمهییز چارواکي ورغلي او له ځینو کورنیو سره یې نغدي مرستې کړې دي.</p>
<p style="text-align: justify;">د يادونې ده، له دې مخکې د جوزجان ولايت په فيضاباد ولسوالۍ کې هم ځيني کورونه په ورته ډول سوځېدلي وو.</p>
