تېر يو کال پکتيا کې ٥١٨ کسان د جنايي جرمونو په تړاو نيول شوي

ګردېز (پژواک، ٨ وږى ١۴٠١): د پکتيا امنيتي مسوولين وايي، په تېر يوه کال کې په دغه ولايت کې ٥١٨ کسان د جنايي جرمونو په تور نيول شوي او ۴٧ نور بيا تښتېدلي دي.

د پکتيا د امنيې قوماندانۍ وياند محمد البدري د وږي په اتمه، ګرديز کې د يوې خبري غونډې پر مهال وويل چې پوليسو په تېر يو کال کې د عامه نظم په ټينګښت، د جنايي جرمونو پر وړاندې مبارزه، د نشه‌يي توکو د قاچاق په مخنيوي او د اداري برخو په اصلاحاتو کې د پام وړ لاسته‌راوړنې درلودې.

هغه د بېلګې په توګه وويل چې د امنيې قوماندانۍ منسوبينو په تېر يوه کال کې ٢٣٣ جنايي پېښې کشف او څېړلې دي چې په تړاو يې ٥١٨ کسان نيول شوي، خو ۴٧ نور تښتېدلي دي.

د هغه د معلوماتو له مخې، په همدې موده کې د نشه‌يي توکو د کشف او ترلاسه کولو په برخه کې ٤٢ ځانګړي عمليات ترسره شوي چې په تړاو يې ٥٥ کسان نيول شوي او زرګونه کيلوګرامه نشه‌يي توکي او ١٢ عرادې موټر ترلاسه شوي دي.

دغه‌راز په دې خبري ناسته کې، د پکتيا د امنيې قوماندانۍ د امنيت امر قاري کرامت‌الله وويل چې د دغه ولايت په بېلابېلو برخو کې د امنيت د ټينګښت په موخه عملي اقدامات ترسره شوي دي.

ده وويل، په تېر يوه کال کې په دغه ولايت کې د کومې مخالفې وسله‌والې ډلې فعاليت نه دى ليدل شوى، خو که داسې کوم حرکت وليدل شي نو سخت به وځپل شي.

د نوموړي په وينا، دا مهال د مخکني حکومت سلګونه کسان له دوى سره په اداري برخو کې کار کوي او بل هرڅوک که وغواړي ورسره کار وکړي، نو دوى به امکاناتو ته په کتو سره ځاى ورکړي.