پلخمري (پژواک، ۱۹ وږی ۱۴۰۱): د بغلان ولایت په شمالي سالنګ سیمه کې د یوه مسافر وړونکي موټر چپه کېدو له امله درې کسان مړه او ۱۲ نور ټپيان شوي دي.
د بغلان د ترافیکو مدیر قاري محمدنذیر عابدي د وږي په ۱۹مه پژواک خبري اژانس ته وویل چې تېره شپه شاوخوا درې بجې د دغه ولايت د خنجان ولسوالۍ اړوند په مالي سالنګ کې یو ۴۰۴ مسافر وړونکی موټر چپه شوى دى.
هغه وايي چې په ياده پېښه کې درې کسان مړه او ١٠ نور ټپيان شوي دي.
خو د سالنګ لویې لارې د څار او ساتنې ادارې مسوول حافظ محمدیعقوب پژواک ته وويل چې په ياده پېښه کې درې کسان مړه او ١٢ نور ټپيان شوي دي.
ده وويل چې د سالنګ لويې لارې د څار او ساتنې ادارې کارکوونکو د پېښې ټپيان د خنجان ولسوالۍ کلينيک ته انتقال کړي دي.
د يادونې ده، ډېرى وخت دغه شان ترافيکي پېښې د موټر چلوونکي د بې احتياطۍ او يا هم د سړکونو د خرابوالي له امله رامنځته کېږي.
Visits: 254
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن