کابل (پژواک، ۴ تله ۱۴۰۱): د ازموینو ملي اداره سربېره پر دې چې د روان کال د تلې له ۱۴مې تر ۲۱مې د هېواد په مرکز او ولایتونو کې د کانکور ازموینې د اخیستلو خبر ورکوي وايي، سږ کال لوړو او نیمه لوړو زدهکړو موسسو ته د محصلانو جذب د تېر کال په پرتله ۲۵ سلنه زیات شوی دی.
د یادې ادارې سرپرست پوهاند عبدالقدیر خموش نن (د تلې ٤مه) له پژواک خبري اژانس سره په ځانګړې مرکه کې وويل، سږ کال د کانکور ازموينې ګډونوالو شمېر ١٤٥زره کسانو ته رسېږي چې نږدې ٤٥زره يې په کابل ولايت کې دي.
نوموړي وویل، د لوړو او نيمه لوړو زدهکړو موسسو ته د محصلانو د جذب ظرفيت د تېرو کلونو په پرتله ٢٥ سلنه لوړ شوی او زیاته یې کړه، د روان کال د کانکور په ازموينه کې له ١٤٥زره ګډونوالو له منځه ٨٠زره يې د لوړو او نیمه لوړو زدهکړو موسسو ته جذبیږي.
د نوموړي په خبره، تېر کال د لوړو او نيمه لوړو زدهکړو موسسو ته شاوخوا ٦٥زره کسان جذب شوي وو.
خموش په دې اړه چې څه ډول یې د جذب ظرفیت لوړ کړی وویل، په هغو پوهنتونونو کې د شرعیاتو پوهنځیو جوړول ترڅنګ چې دغه پوهنځي یې نه درلود، په ځینو پوهنځیو کې نوي ډیپارټمنټونه هم جوړ شوي او په ځینو پوهنځيو کې درسونه دوه وخته شوي چې په پایله کې یې د جذب ظرفیت لوړ شوی دی.
د سرچينې د معلوماتو له مخې، د روان کال د کانکور ازموينه په دوو پړاوونو کې ترسره کېږي چې لومړى پړاو به يې د تلې میاشتې په ١٤، ۱۵ او ۱۶مه د هېواد په ٣٣ ولايتونو کې او دويم پړاو به يې د تلې په ۲۱مه په کابل کې ترسره شي.
هغه وويل، د کانکور ازموينې ګډونوالو ته د کارتونو د وېش لړۍ په خپلو ولایتونو کې بشپړه شوې، خو په کابل کې نن او سبا د کارتونو د ورکړې لړۍ روانه ده چې تر دې وروسته په راتلونکو دوو ورځو کې بایومټریک کېږي.
هغه وويل، هغه ګډونوال چې په مرکز او ولايتونو کې د فورم د وېش له بهيره پاتې دي او نه دي توانېدلي چې په کانکور کې د ګډون فورم ترلاسه کړي؛ کولای شي په متفرقه ازموینه کې ګډون وکړي.
