ګردېز (پژواک، ٢٠ تله ١۴٠١): د پکتيا بڼوال او د مڼو سوداګر وايي، د تېر کال په پرتله د مڼو په حاصلاتو کې زياتوالى راغلى خو د خرڅلاو او ساتنې په برخه کې له ستونزو سره مخ دي.
د پکتیا د کرنې رياست د معلوماتو له مخې، سږ کال د دغه ولايت د مڼو حاصلات ۳۳زره ټنه اټکل شوي چې د تېر کال په پرتله ۱۲ سلنه زياتوالی ښيي.
خو د یاد ولايت سوداګر او بڼوال له حکومته غوښتنه کوي چې د مڼو د حاصلاتو ساتنې لپاره مناسب ځای او په بهر کې دې ورته بازار پيدا کړي.
د سيفالله په نوم يوه بڼوال پژواک اژانس ته وويل: «زمونږ د مڼو حاصلات کال تر بله زياتېږي، زموږ غوښتنه دا ده چې سړېخونې راته جوړې شي ترڅو خپله مېوه په کې وساتو.»
سيفالله وايي، د پکتيا په يو شمېر ولسواليو کې د کرنېزو حاصلاتو ساتلو لپاره سړېخونې جوړې شوې دي، خو دومره ظرفيت نه لري چې ټول حاصلات په کې وساتل شي.
په پکتيا کې د مڼو سيمهييز کاروباري او سوداګر نورالله پژواک ته وويل: «تېر کال همدا وخت يو من مڼې له ۱۸۰ تر ۲۲۰ افغانيو پلورل کېدې، خو سږ یې من له ۶۰ تر ۹۰ افغانيو پورې دی چې بيه يې نيمايي ته راټيټه شوې ده.»
نوموړى وايي، د مڼو د بيو ټيټوالي لامل دا دى چې يو خو کال په کال حاصلات زياتېږي او له بلې خوا، بهر ته په صادرولو کې يې ستونزې دي.
د پکتيا سوداګرۍ خونې مشر حسيبالله ګردېزی وايي چې پخوا به ټولې مڼې پاکستان ته صادرېدلې، خو اوس پاکستان پر مڼو تعرفه لوړه کړې او د ټرانسپورټ له لګښت پرته پر یوه ټن نږدې ۶۲زره کلدارې محصول اخلي.
نوموړى وايي، حکومت بايد د پاکستان پر ځاى نورو هېوادونو ته د مڼو او نورو حاصلاتو د صادرولو زمينه برابره کړي.
په ورته مهال، د کرنې رياست مسوولين د بڼوالو حاصلاتو ته د بازارموندنې ډاډ ورکوي.
د پکتيا د کرنې رياست د کرنيزو چارو آمر مومند خروټي پژواک ته وويل: «په پکتيا ولايت کې هر کال د کرنيزو حاصلاتو د ساتنې په موخه لسګونه سړېخونې جوړېږي خو دا چې کال په کال حاصلات زياتېږي نو سړېخونې هم ورته بسنه نه کوي.»
نوموړى وايي، هغه سړېخونې چې په ځېنو سيمو کې جوړې شوې، په خواشینۍ سره چې بزګران په سم ډول ترې ګټه نه اخلي او د دوى وړانديز دا دى چې دا خونې باید بل چا ته په واک کې ورکړل شي.
خروټى زیاتوي، د کرنې په برخه کې له ځینو موسسو سره يې دا خبره ياده کړې چې په پکتيا کې د حاصلاتو ساتنې لپاره سړېخونې جوړې کړي او هغوى هم دې کار ته زړه ښه کړى دى.
پکتيا يو غرنى ولايت دى چې د کرکېلې لپاره کمه ځمكه لري، خو له تېرو لسو کلونو راهيسې ډېرى خلکو یې د مڼو ايښودلو او پاللو ته مخه کړې ده.
