کابل (پژواک، ۲۵ تله ۱۴۰۱): د خوړو او کرنې نړۍوال سازمان (ایفاېاو) ویلي، ملګري ملتونه په افغانستان کې د لوږې بحران د مخنیوي په موخه، د دغه هېواد له ۳۸ سلنه وګړو سره مرسته کوي.
د اکتوبر شپاړسمه د خوړو نړۍواله ورځ ده چې هر کال په افغانستان او د نړۍ ډېری هېوادونو کې نمانځل کېږي.
د خوړو نړۍوال سازمان د دغې ورځې سږنی شعار «هیڅوک شاته مه پرېږدئ» ټاکلی او د نړۍ په کچه د خوراکي موادو د بحران خبره یې کړې ده.
د خوړو او کرنې نړۍوال سازمان (FAO) تېره ورځ د خوړو نړۍوالې ورځې په مناسبت په یوه خپره کړې اعلامیه کې اعلان کړی چې دغه بنسټ د ملګرو ملتونو د بېړنیو بشردوستانه مرستو د پروګرام له لارې، خپلې مرستې په کلیوالي سیمو کې له کروندګرو او مالدارانو سره ډېرې کړې دي.
د یاد بنسټ د راپور له مخې، په ۲۰۲۲ کال کې د کرنیزو محصولاتو او سبزیجاتو د تولید، نغدي انتقال او د زېربناوو او اوبو لګولو سیستمونو بیا رغولو له لارې به تر ۹ میلیون ډېرو کسانو سره مرسته وشي.
په افغانستان کې د یاد سازمان استازي ریچارډ ټرنچارډ ویلي: «د افغانستان کرنیز سکتور دا توانایي لري چې د پراخو کاري سرچینو په ایجادولو سره د ښځو، ځوانانو او بې ځمکو خلکو په څېر زیان منونکي وګړي له پامه ونه غورځوي.»
نوموړي زیاته کړې: «له کرنې څخه ملاتړ سپما او پالیسۍ ته یوه نږدې مداخله ده چې د ژغورونکي ملاتړ په توګه ډېر لنډمهاله اغېز لري او اوږمهاله بیاموندنې او پایدارې پراختیا لپاره لاره هواروي.»
د یاد بنسټ په خبره، تل یې له هغو هڅو ملاتړ کړی چې په افغانستان کې د خوړو خوندیتوب او د کرنې د ودې لامل ګرځي.
دغهراز د یاد بنسټ په اعلامیه کې راغلي چې د جون او نومبر میاشتو په اوږدو کې د خوړو نه خوندیتوب وضعیت وړاندوینې له مخې، د افغانستان ۲۰ میلیونه وګړي په بحراني یا بېړني حالت کې دي.
د یادونې ده، د دغو ۲۰ میلیون وګړو له ډلې، ۱۳ میلیون ۳۷زره کسان په بحراني او ۶ میلیون ۵۹۳زره یې په اضطراري حالت کې دي.
د ویلو ده چې د خوړو نړۍوالې ورځې په مناسبت د کرنې نړۍوال سازمان اعلامیه، په افغانستان کې د خوړو بحراني وضعیت برسېره کولو په موخه «هيڅوک شاته مه پرېږدئ» تر شعار لاندې خپره شوې ده.
غړيYou need to subscribe to view the full article. Please login or register a new account.
