د لوړو زده‌کړو نوی سرپرست وزیر وایي، له تحصیلي ډګره به د پردیو لاس لنډ کړي

<p style="text-align: justify;">کابل (پژواک، ۳۰ تله ۱۴۰۱): د ریاست الوزار اداري مرستیال وایي، حکومت له خصوصي پوهنتونونو ملاتړ کوي، خو پوهنتنونه باید «دوکانداري» ونه کړي او د لوړو زده‌کړو نوی سرپرست بیا وایي چې له تحصیلي ډګره به د پردیو لاس لنډ کړي.</p>

<p style="text-align: justify;">د ریاست‌الوزار اداري مرستیال مولوي عبدالسلام حنفي نن د کابل مخکنی والي مولوي ندامحمد ندیم د شیخ عبدالباقي حقاني پر ځای د لوړو زده‎کړو د سرپرست وزیر په توګه د دغه وزارت کارکوونکو ته معرفي کړ.</p>

<img class="aligncenter wp-image-494363 " src="https://pajhwok.com/wp-content/uploads/2022/10/حنفی-3-1024x683.jpg" alt="" width="635" height="424" />

<p style="text-align: justify;">حنفي په دې ناسته کې وویل، تغییر او تبدیل یو اصل دی او هر وخت چې هر څوک هر چېرته لازم وبلل شي، ټاکل کېږي.</p>

<p style="text-align: justify;">دی وایي، هېڅ ولس او هېواد له علم او علمي سرچینو ته له لاسرسي پرته بشپړه خپلواکي نه شي لرلی.</p>

<p style="text-align: justify;">د ده په اند، اړینه ده چې د لوړو زده‌کړو مشرتابه اوسنیو پرمختګونو ته په پام تحصیلي نصاب کې داسې بدلون راولي چې په هېواد کې د ستونزو لرې کېدو لامل شي.</p>

<p style="text-align: justify;">دی زیاتوي: «موږ د لوړو زده‌کړو په برخه کې د خصوصي سکټور ملاتړ کوو، خو غوښتنه مو ترې دا ده چې له پوهنتونه د دوکان په توګه ګټه وانخلي.»</p>

<p style="text-align: justify;">د لوړو زده‌کړو مخکني سرپرست وزیر عبدالباقي حقاني وویل چې که د لوړو زده‌کړو وزارت «پیاوړی» او «اسلامي» وي، نو نظام به مظبوط وي او خپل اسلامي مسوولیتونه به هم ترسره کولی شي.</p>

<p style="text-align: justify;">دی وایي، پخوا په تحصیلي بنسټونو کې «دیني ضرورتونه پوره نه وو» او د بل چا اثر پرې و او داسې مسایل به مخ ته راتلل چې له ملي او دیني ارزښتونو سره به په ټکر کې وو، خو که دغه اړتیاوې پوره شي نو نظام به پایښت ومومي.</p>

<p style="text-align: justify;">هغه زیاته کړه چې مخکې په ۱۸ ولایتونو کې د شرعیاتو پوهنځي نه وو، خو اوس په ټولو ولایتونو کې رامنځته شوي دي.</p>

<p style="text-align: justify;">د حقاني په وینا، هیله ده هڅه وشي چې د لوړو زده‎کړو وزارت په چوکاټ کې ټولې کمزورتیاوې له منځه ولاړې شي.</p>

<p style="text-align: justify;">د لوړو زده‌کړو وزارت نوي سرپرست مولوي ندامحد ندیم وویل، د لوړو زده‌کړو په میدان کې کار کول باریک او مهم دی؛ ځکه د نورو خلکو [بهرنیانو] ورته پام وي، هغوی غواړي چې له دغه میدانه ګټه واخلي.</p>

<p style="text-align: justify;">هغه ډاډ ورکړ چې د د دغه وزارت او پوهنتونونو کې د ټولو کسانو ابتکار او علمي پیاوړتیا ته به پام کوي او د پردیو هغه لاسونه لنډوي چې تحصیلي ډګر ته یې غځولي دي.</p>

<p style="text-align: justify;">ده د پردیو لاسونو په اړه چې د چا او څرنګه دي، جزئیات ورنه کړل.</p>

<p style="text-align: justify;">دی وایي چې د لوړو زده کړو په وزارت کې به دوو کارونو ته ډېر پام کوي؛ لومړی دا چې دغه وزارت به د اسلامي چوکاټ پابند وي او دویم دا چې د افغاني غرور او کلتور ساتنه به کوي.</p>

<p style="text-align: justify;">ندیم زیاتوي: «جنجالونه له نفرتونو او بې اعتمادۍ څخه راجوړ دي، خو اسلامي امارت د نفرتونو دښمن دی او د افغانانو د عزت ساتلو نظام دی.»</p>

<p style="text-align: justify;">هغه وویل چې د لوړو زده‌کړو په وزارت کې کوم کارونه چې شوي، هغه به نه ضایع کېږي، بلکې د نور پرمختګ لپاره به یې هڅه کوي.</p>