جلالاباد (پژواک، ۹ لړم ۱۴۰۱): د ننګرهار امنيتي مسوولين وايي چې د دغه ولایت په مرکز جلالاباد ښار کې يوه پلار خپل زوی وژلى خو قاتل نيول شوى دى.
د معلوماتو له مخې، پېښه د پلار او زوی ترمنځ له لفظي شخړې وروسته رامنځته شوې ده.
د ننګرهار د امنيې قوماندانۍ وياند عبدالبصير زابلي د لړم په ۹مه پژواک اژانس ته وويل، د جلالاباد ښار د اوومې ناحيې اړوند غوچکو سيمه کې يوه پلار خپل زوی هغه مهال وژلی چې زوی يې پرې ګوزارونه کړي دي.
دی وايي، قاتل د امنيتي ځواکونو له لوري د پېښې په ساحه کې نيول شوی او قوماندانۍ کې تر پوښتنو لاندې دی.
اللهخان چې اصلاً د ننګرهار د روداتو ولسوالۍ اوسېدونکی دی او اوس د جلالاباد ښار اوومه ناحيه کې اوسېږي، وايي، پرون يې زوی له خپلې نيا (د ده له مور) سره لفظي شخړه وه، ده پرې غوسه وکړه، خو زوی يې دی په څپېړه وواهه.
هغه زياته کړه: «زما له مور سره يې لانجه وه، بيا ما پسې کوټې ته راننوت، زه يې په لوټه باندې وويشتم، بيا يې درې څپېړې هم ووهلم، وړوکی د مېوې چاقو پروت و، ما چې پر هغه باندې وواهه، مړ شو.»
