کندهار (پژواک، ۱۱ لړم ۱۴۰۱): د کندهار د میوند ولسوالۍ اړوند د کابل - هرات پر لویه لار د یوه فیلډر او ټېلر موټرو د ټکر له امله پنځو کسانو ته مرګژوبله اوښتې ده.
د کندهار ولایت مقام مطبوعاتي مسوول حاجي زید پژواک خبري اژانس ته وویل، دغه پېښه نن سهار شاوخوا نهه بجې د میوند ولسوالۍ بازار ته څېرمه شوې ده چې په فیلډر موټر کې سپاره درې کسان (دوه نارینه او یوه ښځه) مړه شوي او دوه نور کسان ژوبل شوي دي.
ده زیاته کړه، ټپيان د امنیتي کسانو له خوا د درملنې په موخه روغتون ته لېږدول شوي دي.
د ده په خبره، لومړني معلومات ښيي چې پېښه د بې احتیاطۍ له امله شوې ده.
د میوند ولسوالۍ یوه اوسېدونکي میرزامحمد پژواک خبري اژانس ته وویل، د دې ولسوالۍ په ساحه کې سړک خراب دی چې له امله یې ډېر مهال د تېز سرعت له امله ترافیکي پېښې کېږي.
د یادونې ده، تېره اونۍ د کندهار ښار او سپین بولدک ولسوالۍ پر لویه لار هم د ترافیکي پېښې له امله شپږو کسانو ته مرګ ژوبله اوښتې وه.
د ترافیکي قوانینو نه مراعاتول، سرعت، بې احتیاطي او د سړکونو خرابوالی هغه څه دي چې د ترافیکي پېښو د زیاتوالي لامل ګڼل کېږي.
غړيYou need to subscribe to view the full article. Please login or register a new account.
