کابل (پژواک، ۱۸ لړم ۱۴۰۱): د بریتانیا حکومت ویلي وو چې پوځیانو یې د ۲۰۰۶ او ۲۰۱۴ کلونو ترمنځ هلمند کې ۱۶ ماشومان وژلي او کورنیو ته یې تاوان ورکړی، خو د راپورونو له مخې، دغه شمېر تر دې څلور برابره لوړ دی.
د بيبيسي د راپور له مخې، دا شمېرې د وسلهوال تاوتریخوالي لپاره یوې خیریه مؤسسې (چریټي اکشن) له څو غوښتنو وروسته ترلاسه شوي دي.
سرچينه زياتوي، د بریتانیا د دفاع وزارت اسنادو کې چې څه موده وړاندې خپاره شوي، خو ځینې برخې یې پټې ساتل شوې وې، یوازې د ۱۶ ماشومانو خپلوانو ته د تاوان د ورکړې خبره شوې وه.
خو د سرچینې د څرګندونو له مخې، د وسله وال تاوتریخوالي په تړاو اقدام په نوم خیریه ادارې د نورو معلوماتو له غوښتنې وروسته اوس ویل کېږي چې دا شمېر لږ تر لږه ۶۴ دی او د پېښو په تړاو ټولو ثبت شوو راپورونو کې د وژل شوو ماشومانو عمرونه نه وو لیکل شوي.
د سرچينې د معلوماتو له مخې، ډېری دغه ماشومان د ۲۰۰۶ او ۲۰۱۴ کلونو ترمنځ هلمند کې د بریتانوي سرتېرو پوځي عملیاتو کې وژل شوي او د ډېری ماشومانو د مړینې لامل د بهرنیو ځواکونو بریدونه او په جګړه کې د ښکېلو غاړو ترمنځ نښتو کې ایسار پاتې کېدل ښودل شوي دي.
د راپور له مخې، په ټوله کې د شاوخوا ۴۰ سلنه وژل شوو ماشومانو عمرونه تر لسو کلونو ټیټ دي، هرې کورنۍ ته د ورکړل شوي تاوان کچه په لویه کچه توپیر لري او د هر ماشوم لپاره ورکړل شوی تاوان په منځنۍ کچه څه باندې ۱۶۰۰ پونډه دی.
د نړۍوالو چارو شنونکی او د يوه خصوصي پوهنتون استاد ذاهد امرخېل پژواک خبري اژانس ته وویل چې د بريتانيايي ځواکونو له لوري په افغانستان کې د ماشومانو وژل يو جنايت دی او بايد په کره ډول وڅېړل شي.
هغه زياتوي: «اساسي بحث د دیت دی، موږ په الهي قوانينو او نړۍوالو نورو اصولو کې د ديت موضوع لرو، خو شرايط يې توپير لري؛ خو دا موضوع ورګرځي دې ته چې د دواړو هېوادونو اړيکې څه ډول وې او څه ډول دي؟»
امرخېل ياد تاوان ډېر کم وباله او ويې ویل، هر کس ځان ته ځانګړی حيثيت، کرامت او شخصیت لري، هیڅوک د چا قیمت نه شي ټاکلی او بايد دا موضوع د هېوادونو د اړيکو پر بنسټ وڅېړل شي.
د بيبيسي د راپور له مخې، د بریتانیا دفاع وزارت ویلي، جګړه کې د هر ملکي وګړي وژل کېدل ویرجنه پېښه ده، هېواد یې د دغه خطر مخنیوي لپاره سخت کار کړی، خو دغه ستونزه هیڅکله په بشپړه توګه له منځه نه شي وړل کېدای.
په راپور کې راغلي، د وسلهوال تاوتریخوالي په تړاو د اقدام خیریه ادارې ویلي، د دغو معلوماتو په ترلاسه کولو د دومره وخت لګېدل د دفاع وزارت په چارو کې د روڼتیا نشتوالی ښیي او دا پوښتنه راپورته شوې چې ایا له دې زدهکړه شوې او که څنګه.
غړيYou need to subscribe to view the full article. Please login or register a new account.
