کابل (پژواک، ۲۳ لړم ۱۴۰۱): په غزني له ۵۰۰۰ اړو کورنیو سره د خوراکي توکو، سمنګان کې له ۲۴۰ بېوزلو مېرمنو سره د هګیو چرګو او فراه کې له ۶۰۰ اړو کورنیو سره د نغدو پيسو او ژمنیو توکو مرسته وشوه.
د غزني د کلیو بیارغونې او پراختیا رییس مولوي محمد قاسم امیني پژواک خبري اژانس ته وویل، موده مخکې په اندړو ولسوالۍ کې سروې شوې وه چې په پایله کې یې تر پنځه زره ډېرې اړې او بېوزلې کورنۍ په نښه شوې دي.
هغه زیاته کړه، نن پر یادو شوو کورنیو د خوړو نړۍوال پروګرام/ WFP له لوري خوراکي توکي ووېشل شول.
دی وايي، هرې کورنۍ ته ۵۰ کیلوګرام اوړه، ۶ کیلوګرام دال، ۵ لېټره غوړي، یوه اندازه مالګه او د ښځو لپاره تقویتي خواړه ورکړل شول چې تر یوه وخته به د هغوی اړتیاوې پوره کړي.
له بلې خوا، د سمنګان د کرنې او مالدارۍ ریاست د وزو او پسونو د روزنې مدیر محمد فرهاد سارباغي پژواک خبري اژانس ته وویل، افغان اېډ موسسې د دغه ولایت پر ۲۴۰ بېوزلو مېرمنو د هګیو چرګې او د هغو د ساتلو اړوند دانه او وسایل ووېشل.
هغه زیاته کړه، دغه مېرمنې د یاد ولایت د مرکز ایبک او دره صوف ولسوالۍ اوسېدونکې دي چې هرې یوې ته ۱۸ چرګې، ۲ چرګان، ۱۰۰ کیلوګرامه د چرګانو دانه او د اړتیا وړ نور توکي ورکړل شول.
دی وايي، له دې مرستې سره به یادو شوو ښځو ته په کور دننه د کار او عاید زمینه برابره شي څو چرګوړي تولید او په بازار کې یې وپلوري.
د یوه بل خبر له مخې، په فراه ولایت کې له سلګونو کورنیو سره نغدي او د ژمنیو توکو مرسته وشوه.
د فراه د اطلاعاتو او کلتور رییس مولوی عبدالحی سباوون وایي، نن د دغه ولایت په مرکز کې د کډوالۍ نړۍوال سازمان (IOM) په مالي ملاتړ، د طبیعي پېښو پر وړاندې د مبارزې او چمتووالي ریاست په همغږۍ سره، له ۶۰۰ اړو، بېځایه شوو او د طبیعي پېښو له امله زیانمنو کورنیو سره نغدي او د ژمنیو توکو مرسته وشوه.
هغه وویل، له هرې کورنۍ سره ۱۷۵۰۰ افغانۍ نغدي او ترڅنګ یې د درېيو کمپلو او ۱۲ قلمه بېلابېلو ژمنیو توکو مرسته وشوه.
د دغو مرستو د وېش پرمهال د طبيعي پېښو پر وړاندې د چمتووالي رییس مولوي محمد اسرائیل سیار د (IOM) ادارې له مسؤولینو د مننې کولو ترڅنګ وویل چې یادې ادارې تل د اړو، کډوالو او له طبیعي پېښو څخه د زیانمنو شوو کورنیو لاسنیوی کړی او پر وخت یې ورسره مرستې کړې دي.
ده همدارنګه د اړو کورنیو د سروې او مرستو رسولو د روڼتیا په اړه وویل: «د دې کورنیو سروې یو کال وړاندې شوې وه چې له نېکهمرغه نن ورته په بشپړې روڼتیا سره مرستي ووېشل شوې.»
غړيYou need to subscribe to view the full article. Please login or register a new account.
